ट्विन टावर आक्रमणया छगू दशक

अमेरिकां सेप्टेबर ११ य् जूगु आक्रमणया झिदँ अर्थात छगू दशक क्यंगु लसताय् झिदँया दिवस न्यूयोर्क व वासिङ्टन डी सी व पेन्सील्भेनियाय् ब्यागलं ज्याझ्वःलिसे हंगु दु । प्यंगः हाइज्याक यानातःगु हवाई जहाजपाखें स्वंगू शहरय् याःगु आक्रमणय् लानाः सीपिं थ्यंमथ्यं स्वद्वःया लुमन्तिइ स्मृतिसभा याःगु खः ।

ट्विन टावर दुगु वर्ड टे्रड सेन्टरया लागाय् अमेरिकां आधिकारिक स्मृतिसभा ग्वसाः ग्वःगु खः । थ्वहे दथुइ राष्ट्रपति बाराक ओबामां अमेरिका न्ह्याबलें आतंकवादया विरुद्धय् सचेत जूगु न्ह्यःथंगु दु । न्हापा थें हे थुगु दँ नं न्यूयोर्कय् जूगु ज्याझ्वलय् थीथी घाःपाः जूपिनिगु नां सार्वजनिक याःगु दु ।

लुमंके बह जू, झिदँ न्ह्यःया आक्रमणया झ्वलय् स्वंगूगु जहाज पेन्टागनय् थक्कर नकूगु खःसा प्यंगूगु जहाजय् दुपिं यात्रुतय्सं हाइज्याकरतलिसे प्रतिरोध याःगु कारण पेन्सील्भेनियाया सान्स्किभिल मैदानय् दुर्घटना जूगु खः ।
आइतवाः जूगु स्मृतिसभाया हे झ्वलय् ट्विन टावर न्ह्यःने प्रत्येक पुखुलिइ छगू एकडय् न्यनाच्वंगु निगू पुखूत उलेज्या नापं यायेगु घोषणा याःगु खः ।

सेप्टेम्बर ११ य् सीपिं सर्वसाधारण व सन् १९९३ सं वर्ड टे्रड सेन्टरय् जूगु बम हमलाय् सीपिं खुम्हसिया नं नां दुथ्याकूगु ताम्रपत्र तइगु साचार माध्यमतय्सं जानकारी ब्यूगु खः ।

राष्ट्रपति बाराक ओबामां स्वंगुलिं थासय् सप्ताहब्यापी ज्याझ्वलय् ब्वति कायेगु ज्याझ्वः दुगु नापं न्ह्यःथंगु दु ।

More Stories Like this