वैद्य न्हूगु पार्टी गठनपाखे?

प्रचण्डं भारतलिसे गोप्य सहमति याना वःगु द्वपं

येँ (सन्ध्या टाइम्स)/माओवादीया संस्थापन पक्षं अल्पमतय् लाःम्ह बरिष्ठ उपाध्यक्ष मोहन बैद्य किरण पक्षधरयात कारवाही याइगु जुइवं वैद्य पक्षं संविधानसभा दुने हे न्हूगु पार्टी दर्ता यायेगु तयारी यानाच्वंगु खँ सीदुगु दु।
न्हूगु पार्टी दर्ताया लागिं माःगु कथं सभासद्तय्गु ल्याः बैद्य पक्षं मुका नापं तयेधुंकूगु खँ नं सूत्रं धाःगु दु ।

पार्टी अध्यक्ष प्रचण्ड लगायत उपाध्यक्षपिं प्रधानमन्त्री डा. बाबुराम भट्टराई व नारायणकाजी श्रेष्ठ छगू हे थासय् च्वनेवं अल्पमतय् लाःम्ह मेम्ह उपाध्यक्ष वैद्य पक्षं यदि थःपिंत कारवाही यात धाःसा तुरुन्त हे मेगु पार्टी दर्ता यायेगु ल्याखं थ्व तयारी यानाच्वंगु खँ सूत्रं धाःगु दु। पार्टीया संस्थापन पक्षं अल्पमतय् लाःम्ह वैद्य लगायत वय्कः पक्षधर नेतातय्त कारवाही यायेफुगु आशंका नं वैद्य पक्षं यानाच्वंगु दु। अज्याःगु कारवाहीया संकेत वयेवं हे न्हूगु पार्टी दर्ताया प्रक्रियाय् वनेगु खँ वैद्य पक्षं धयाच्वंगु दु।
पार्टी दुने लाईन संघर्षया झ्वलय् संस्थापन पक्षं वैद्य पक्षयात कारवाही यायेगु आन्तरिक तयारी यानाच्वंगु द्वपं वैद्य पक्षं बीगु यानाच्वंगु दु। वैद्य पक्षयात कारवाही यायेत संस्थापन पक्षं भारतलिसे सहलह यानाच्वंगु द्वपं तकं वैद्य पक्षं बियाच्वंगु दु ।

उपाध्यक्ष डा. बाबुराम भट्टराईया नेतृत्वय् सरकार दयेके न्ह्यः भारतलिसे माओवादीया संस्थापन पक्षं प्यंगू बुँदाया सहमति याःगु दु धइगु तकं बैद्य पक्षया द्वपं दु। छम्ह नेतां धयादी कथं सरकार दयेके न्ह्यः पार्टीया संस्थापन पक्षं सहमति याःगु प्यंगू बुँदा मध्ये कन्टेनरया ताःचा लःल्हायेगु छगू बुँदा क्वचायेकेधुंकूगु दुसा आः मेगु स्वंगू बुँदा पूवंके ल्यं दनि। उगु स्वंगू बुँदाय् पार्टीया 'हार्ड लाइनर'तय्त कारवाही यायेगु, भारतया लगानीइ चले जुयाच्वंगु परियोजनाय् नेपाली सेनां सुरक्षा बीगु नापं नेपाःया अन्तर्राष्ट्रिय विमानस्थलय् भारतया मार्शल तयेगु खः ।

थ्व हे प्यंगू बुँदे सहमतिया आधारय् हे संस्थापन पक्ष न्ह्याः वनाच्वंगु खँ बैद्य पक्षया नेतातय्सं थः लिक्क लाःपिं कार्यकर्तातय्त कनेगु यानाच्वंगु दु। भारतलिसे जूगु धाःगु थ्व सहमतियात सरकारं गुलि कार्यान्वयन याइ धकाः नं वैद्य पक्षं स्वयाच्वंगु सूत्रया दावी दु ।

लाइन स्वंगू हे तिनि
अध्यक्ष प्रचण्ड व उपाध्यक्ष डा. बाबुराम भट्टराई छथाय् लायेधुंकाः आः न्हापा दुगु स्वंगू लाइन हटे जुयाः पार्टी दुने निगू जक लाइन दनि धकाः अनुमान जूसां पार्टी दुने स्वंगू लाइनया अस्तित्व धाःसा अझं कायम दनिगु खँ धाःगु दु।
अध्यक्ष प्रचण्ड पक्ष व उपाध्यक्ष बैद्य आः छथाय् दुसां राजनीतिक रुपं वय्कःपिनि थःथःगु लाइन धाःसा कायम हे दनि। लिसें निम्हेस्यां नं थःथःगु पक्षया कार्यकर्ता भेला यायेगु ज्या नं न्ह्याका हे च्वंगु दनि। थ्व झ्वलय् म्हिगः तिनि भट्टराई पक्षया कार्यकर्तातय्गु तःजिगु भेला येँय् जूगु दु ।