अराजक ज्याय् माओवादी सक्रिय: कोइराला

येँ (सन्ध्या टाइम्स)/नेपाली कांग्रेसया सभापति सुशील कोइरालां प्रजातन्त्र बाहेक मेगु छुं नं कथंया वादया भविष्य मदु धयादीगु दु। आःया अवस्थाय् माओवादीं प्रजातन्त्रयात हे न्ह्यसः थनाहःगु दु धासें वय्कलं धयादिल, 'माओवादीं बहुलवाद नाला मकासे प्रजातन्त्रयात अराजक धयाच्वंगु दु।' बिपी जयन्तीया लसताय् कांग्रेस विराटनगर समितिं थौं सुथय् याःगु हिदान ज्याझ्वलय् न्ववासें सभापति कोइरालां धयादिल, 'प्रजातन्त्रयात अराजक धाइपिं माओवादीत वास्तवय् थः हे अराजक गतिविधिइ सक्रिय जुयावःगु दु ।'

कांग्रेसं प्रजातन्त्र विरुद्ध मेगु छुं नं वादलिसे सम्झौता याइ मखु धासें वय्कलं प्रजातन्त्रयात छुं नं वादं लादे यात धाःसा व वादया भविष्य दइ मखु धयादिल। कांग्रेसया हे नेतृत्वय् राणा शासन, पञ्चायत व राजतन्त्रयात हांनिसें ल्यहेंथना छ्वयेगु ज्या जूगु दु धासें सभापति कोइरालां धयादिल, 'प्रजातन्त्र विरुद्ध छुं नं कथंया शक्तिं चलखेल यात धाःसा उकियात नं हांनिसें लिना छ्वयेगु जुइ ।'

विराटनगरय् कांग्रेस कार्यकर्तातय्सं राजनीतिक साधन दयेकाः आर्थिक लाभ कायेत सक्रिय जूगु गुनासो थःत वःगु दु धासें वय्कलं अज्याःगु प्रबृत्ति तत्काल बन्द यायेत तकं निर्देशन बियादिल ।

राजनीतिइ विकृतिं प्रश्रय कायेगु यानाच्वंगु खँ न्ह्यथँसें वय्कलं उकिया विरुद्ध कार्यकर्तात छप्पँ जुयाः वनेमाः धकाः नं धयादिल। अथे हे बिपीया मार्गयात ल्वःमंकेगु ज्या मयायेत कार्यकर्तातय्त निर्देशन बिसें वय्कलं कांग्रेसं बिपीया मार्गयात ल्वःमंकल धाःसा राष्ट्रियता हे ल्वःमनी धकाः नं स्पष्ट यानादिल ।