थनिंनिसें कुमारी जात्रा
येँ (सन्ध्या टाइम्स)/येँयाःया झ्वलय् थनिंनिसें कुमारीया रथ सालाः जात्रा याइगु जूगु दु। थौं क्वनेयाःया झ्वलय् सनिलय् कुमारी नापं गणेश व भैरवया रथयात क्वःने लागाया लगं, क्वहिति, भिंद्यःत्वाःपाखे साली। जात्राय् राष्ट्रप्रमखुया हैसियतं राष्ट्रपति डा. रामवरण यादव झाइ ।
दागिं पिकाइगु कुमारीया रथ याः न्यायेवं थौं हे बहनी दागिं पिहां वइ। दागिंया लिउलिउ थ्व वंगु दच्छिया दुने छेँजः मदुपिं बर्खिमाःपिं मनूत वइ। मरु त्वालं दागिं पिहां वयाः चान्हय् थक्वाःया यंकि दहलय् म्वः ल्हू वनीगु चलन दुसां अन वने मफुपिं मरुहितिया पूर्वपाखे स्वयाच्वंगु हितिया लखं म्वः ल्हुइगु याइ। अन यंहि दहया हे लः वइ धाइ।
बौमत वनीगु दागिं बाचाः चाःहिल कि मरु त्वालं हे बौमत पिहां वइ। न्हूसाःया साय्मितय्सं पंया बालाय् मत तयाः पिकाइगुयात बौमत धाइ ।
