सिक्किमया इन्द्रजात्राय् येँपाखें नं ब्वति
येँ (सन्ध्या टाइम्स)/सिक्किम नेवाः गुथिया ब्वनाय् येँपाखें सिक्किमय् जुइगु इन्द्र जात्रा पर्वय् ब्वति कायेत येँया छगू पुचः नं उखेपाखे वंगु दु। येँपाखें २८ म्हेसिया छगू साँस्कृतिक व साहित्यिक पुचः वंगु विहीवाः सिक्किम प्रस्थान जूगु खः ।
सिक्किमय् वंगु झिदँ न्ह्यवंनिसें सिक्किम राज्यय् बसोबास यानाच्वंपिं नेवाः समुदायं इन्द्र जात्रा, कुमारीया खः जात्रा व बाजागाजालिसें जात्रा हनेगु याना वयाच्वंगु दु। थ्व झ्वलय् अन थौं भाद्र २५ गते इन्द्रजात्रा पर्व हनेगु ज्या जुयाच्वंगु दु। उगु जात्राय् ब्वति कायेगु लिसें सिक्किमय् तुं स्थानीय नेवाः बाखं च्वमितलिसे जानाः बाखं गोष्ठी यायेगु लागिं बाखं दबूया पुचः उखे वंगु खः। पुचःया नेतृत्व मध्यपुर कला परिषद्या सल्लाहकार गणेशराम लाछिं यानादीगु खः ।
भाद्र २५ गते न्हिनय् कुमारी जात्रा यानाः सन्ध्या इलय् येँ व सिक्किमया कलाकारतय्सं साँस्कृतिक ज्याझ्वः नं न्ह्यब्वइगु ग्वसाः दु। उगु ज्याझ्वलय् सिक्किमया मुख्य मन्त्री पवन चामलिङ्गं नं मूपाहां कथं ब्वति कयादी। अथे हे भाद्र २७ गते सिक्किम व येँया बाखं दबूया मंकाः ग्वसालय् नेपालभाषा बाखं गोष्ठी नं याइगु ग्वसाः दु।
सिक्किम व येँया उगु मंकाः बाखं गोष्ठी व अन्तर्क्रियाय् बाखं दबूया नायः लक्ष्मण राजवंशी मेमेपिं नं बाखं च्वमितय्सं थःपिनि रचना पाठ यानादीगु ग्वसाः दु। ज्याझ्वः क्वचायेकाः उगु पुचः मेगु वालय् जक येँय् लिथ्यनी धाःगु दु ।
