जगतसुन्दर ब्वनेकुथी मेगु सिरपाः



येँ (सन्ध्या टाइम्स)/जगतसुन्दर ब्वनेकुथि संचालक समितिया नायः लिसें पुलांम्ह सभासद् लक्ष्मीदास मानन्धरं एसएलसी परिक्षाय् नेपालभाषा कयाः ब्वंपिं ब्वँमिपिंत तिबः जुइकथं छगू न्हूगु सिरपाः नीस्वनादीगु दु। भाजु मानन्धरं व्यक्तिगत रुपं नीस्वनादीगु "लक्ष्मी नारायण" सिरपाः नेपालभाषा विषय कयाः एसएलसी दकलय् अप्वः ल्याः हःपिं निम्ह ब्वँमिपिंत बीगु जूगु दु। छम्ह छात्र व छम्ह छात्रायात बीगु उगु सिरपाःया राशि म्हतिं झिद्वः तका जुइगु खँ भाजु मानन्धरं कनादीगु दु। थः मां-अबुया लुमंतिइ भाजु लक्ष्मीदास मानन्धरं नीस्वनादीगु उगु सिरपाः वइगु असोज १५ गते लःल्हाइगु खँ सीदुगु दु। डा. चुन्दा बज्राचार्यया अध्यक्षताय् वंगु बिहीवाः कुन्हु नीस्वंगु छगू पुचलय् भाजु मानन्धरं सिरपाः बारे जानकारी बियादीगु खः। उगु पुचलय् माया मानन्धर, राजभाई जकःमि, रत्नदेवी कंसाकार व शान्ति मानन्धरपिं दुजः कथं च्वनादीगु खःसा भाजु देवदास मानन्धर न्वकु कथं च्वनादीगु खः। थ्व स्वयां न्ह्यः जगतसुन्दर ब्वनेकुथिया शिक्षिका मय्जु शान्ति मानन्धरं नं थःगु हे नामं एसएलसी नेपालभाषा विषयसं अप्वः ल्याः हःपिं ब्वँमिपिनिगु निंतिं 'शान्ति सिरपाः' नीस्वने धुंकूगु दुसा उगु सिरपाः लःल्हायेगु ज्या नं क्वचाये धुंकूगु दु। संचालक समितिया नायः लक्ष्मीदास मानन्धरं नीस्वनादीगु थुगु सिरपाः निरन्तर रुपं दँय्दसं बीगु खँ नं धाःगु दु ।