राहत: घोषणा मखु कार्यान्वयन या

माओवादीया वरिष्ठ नेता डा. बाबुराम भट्टराईया नेतृत्वय् गठित सरकारं जनतायात तत्काल राहत बीगु ज्याझ्वः घोषणा याःगु दु। थुकी खास यानाः न्ह्यःने वयाच्वंगु मोहनि नखःया इलय् हाकुबन्जाः याइपिंत कारवाही यायेगु, भ्रष्टाचार पनेगु, बजार अनुगमन यायेगु आदि थेंज्याःगु ज्याझ्वःत दुथ्याः। लिसें माओवादीं न्ह्याकूगु झिदँ ताःहाकःगु जनयुद्ध व मेमेगु आन्दोलनय् लानाः बेपत्ता जूपिं, अंगभंग जूपिं आदि मनूतय्त आर्थिक ग्वाहालि यायेगु आदि थेंज्याःगु खँ नं उकी दुथ्याः ।

सरकारं राहत कार्यक्रम घोषणा याइगु छुं तःधंगु खँ मखु। न्हापा न्हापाया सरकारतय्सं नं थज्याःगु राहतया प्याकेज जनतायात यक्व हे बीधुंकल। तर विडम्बना छु जुइ धाःसा थम्हं घोषणा याःगु अज्याःगु राहतया प्याकेज खोले याये न्ह्यः हे सरकारं आर्यघाटया लः त्वनेधुंकी। छुं जुयाः सरकार बचे हे जुयाच्वंसां सरकारवालातय्सं जनतायात बिउगु अज्याःगु राहतया खँयात निला स्वलाया दुने पूवंक ल्वःमंके धुंकी। उकिं राहत कार्यक्रमया घोषणा आः जनताया लागिं छुं लसताया खँ मखु। उकियात कार्यान्वयन यानाः क्यँसा हे जक जनतां पत्याः याइगु बाहेक आः जनताया विश्वास त्याकेगु मेगु उपाय मदु। आः घोषणा जूगु राहत प्याकेजं जनतायात गुलि लय्तायेकी वा धाथें गुलि राहत बी धइगु खँ उकिया कार्यान्वयनं हे जक क्यनी। पत्रकार सम्मेलनय् ततःसलं हालाः घोषणा यायेवं जक जनतां उकियापाखें छुं काये फइ मखु। प्रधानमन्त्री डा. बाबुराम भट्टराईया टिमं थम्हं हे घोषणा याःगु थ्व राहत कार्यक्रम गबलय् गुलि ताःलाक कार्यान्वयन याइ, व धाःसा स्वये हे मानि ।

More Stories Like this