१२ बुँदे राहत ज्याझ्वः संविधान दयेकेगु गवले ?

माओवादीया नेतृत्वय सरकार गठन जुइवंहे सुशासन, महंगी व भ्रष्टाचारया विरुद्ध ज्या यायेगुया नापनापं आम जनतायात राहत वीगु ज्याझ्वः यायेगु धकाः धाःगु लगत्तै शुक्रवाः सिंहदरवार दुने छगू पत्रकार सम्मेलन यानाःझिनिगू वुंदे तत्काल राहत ज्याझ्वः २०६८ सार्वजनिक याःगु दु । थः प्रधानमन्त्री त्यायेवंहे माओवादीया न्वकु डा. बाबुराम भट्टराईं थ्व खँयात न्ह्यःने हःगु खः । अथ्यला थ्व स्वयाः न्ह्यः हे राहतया ज्याझ्वः दयेके धुंकूगु खः । तर उगु ज्याझ्वलय् मधेसी मोर्चातय्गु मांग दुमथ्याः धकाः विरोध यायेवं हानं संशोधन यानाः राहतया ज्याझ्वः वंगु विहिवाः वहनीतिनि पूर्णत तयार याःगु खः ।
सरकारया मूज्या शान्ति व संविधान खःसां गवले तक्क जनतायात छुं ठोस ग्वाहालि जुइगु कथंया राहतया ज्याझ्वः मवल धाःसा सरकार थःगु मू दायित्व पूर्णत थाकुइगु धयागु खँयात महसूस यानाः हे सरकारं राहतया ज्याझ्वः पितहःगु खः ।

थौं देशय् समस्यात यक्कों दु । व्यवस्थापन, सुशासन व भ्रष्टाचार नियन्त्रणय् खास ज्या याये मफुत धाःसा थुकिं देशय् मेमेगु क्षेत्रय् नं प्रभावत त्वःती । मूल्य वृद्धिं आकासय् थियाच्वंगु दु । सार्वजनिक सेवाय्, सुरक्षाया ख्यलय्। तःधंगु समस्यात दु । सुरक्षा व्यवस्थाय् सुधार व लोड सेडिङ्ग, त्वनेगु लः, दुर्गम क्षेत्र व लक्षित वर्गया विकास, सामाजिक सुरक्षा व विकास सम्वन्धी थीथी ज्याझ्वःयात सार्वजनिक याःगु खः । प्रधानमन्त्री डा. भट्टराइ व मेमेपिं मन्त्रीतय्गु उपस्थितिइ उगु राहतया ज्याझ्वः सार्वजनिक याःगु खः । नेपाःमितय्गु तःधंगु नखः मोहनि लुखा क्वसं वयाच्वंगु इलय् राहतया थुगु घोषणां जनताया दथ्वी छगू खुसि व आनन्दया वातावरण सृजना जूगु दु । तर थुकियात व्यवहारय् शतप्रतिशत लागू यानाः क्यनेत धाःसा उलिहे थाकु, उलिहे हाज्यांजाः ।

मात्रै घोषणा यानाः सुम्क ल्हातय् ल्हाः प्वः चिनाः च्वन धाःसा थ्व लागू जुइमखु । थुकिया नितिं सिद्धान्त सरकारं व्यवहारय् लागू यानाः क्यनेत साहसया नापनापं युद्धसारय् ज्या खँ यानाः अनुगमन क्वातुइमाः । अथ्यला शान्ति प्रकृया, संविधान निर्माण व राहतया ज्याझ्वः अन्तर सम्वन्धित धाःगु दु । तर शान्ति प्रकृया व संविधान निर्माण निता खँ गुलि अन्तरसम्वन्धित खः उलि राहतया ज्याझ्वः मखु, जुइनं मखु । सरकारं संक्रमणकालिनय् राहतया ज्याझ्वःयात व्यवहारिक रुप वियाः लागू यायेगु गुलित जरुरत दु उलिहे शक्ति व संविधान दयेकेगु खँय् नं उलिहे तत्परता पूर्वक न्ह्याः वनेमाः । शान्ति प्रकृयाया छगू महत्वपूर्ण अंग सेना समायोजनया खँ न्ह्यःने हःथे वर्तमान डा. भट्टराईया नेतृत्वया सरकारं संविधान दयेकेगु खँय् उलि गम्भीर रुपं पहल यानाच्वंगु खनेमदु । संसदीय पार्टीतय्गु मांग पूवंकेत दत्तचित्त जुयाः न्ह्याः वनाच्वंथे संविधान दयेकेगु खँय् नं उलिहे पहल व जिम्मेवारीपूर्वक न्ह्यःने वनेमाल । लङ्गरा जुइक हत्थासं ताःचा विशेष समितियात लःल्हाःथें आवश्यक व पूर्वाधार विनाः सेना समायोजनया नामय् मिखा तिस्सिनाः संसदवादीतय्त लय्तायेकेगु छुंहे जरुरत मदु । थःपिनिगु ल्हाः तलय् लाकाः सेना समायोजन जुइमखु, थ्व माओवादीया निति घाटक जुइफु । उकिं राहतया ज्याझ्वः सुथां लाक्क व्यवहारिकरुपं बियाः वनेथें संविधान निर्माणया खँय् ठोस खँ न्ह्यःने वयेमाल । विवाद जुयाच्वंगु विषयत ज्यंकेमाल ।

More Stories Like this