माओवादीया प्रेस विज्ञप्ति तकं कब्जायात

येँ (झीगु स्वनिगः)

एकीकृत नेपाल कम्युनिष्ट पार्टी -माओवादी) दुने लाईन संघर्ष जुयाच्वंगु झ्वलय् बरिष्ठ नेता मोहन बैद्य व मूछ्याञ्जे रामबहादुर थापा बादलं ल्हाःचिं तयातःगु पार्टीया आधिकारीक प्रेस विज्ञप्ति तकं वर्तमान सरकारय् वनाच्वंगु माओवादीया नेताया कर्याकर्तातय्सं कब्जा याःगु दु । लडाकुया कन्टेनरया ताःचा लःल्हाःगु धैगु पार्टीया निर्णयया अःखः खः धकाः पिथंगु विज्ञप्ति वंगु शुक्रवाः बहनी एकीकृत माओवादीया येँ जिल्ला सांगठनिक निर्वाचन क्षेत्र नं. १२ या ईन्चार्ज सृजानां प्रेस विज्ञप्ति पिथनाः अथे पार्टीया प्रचार सामग्री लाकाकाःगु खः धकाः जानकारी बियादीगु दु । उगु क्षेत्रया फुटुङय् च्वंगु क्षेत्रीय ज्याकुथिइ थःपिं सरकारवादी पक्षधर धाःइपिं छपुचः मनूत वयाः अथे प्रचार सामग्री कब्जायाःगु खः धकाः तकं विज्ञप्तिइ न्ह्यथनातःगु दु । अथे हे सत्य व सहि विचार खनाः ग्यानाः अथे प्रचार सामग्री कब्जाय् काःगु धैगु पराजीत मानसिकता खः धकाः तकं न्ह्यथनातःगु दु ।

थ्व हे झ्वलय् वंगु विहिवाः हे येँया मखनय् मोहनि नखःया 'शुभकामना सांस्कृतिक साँझ' ज्याझ्वःया टिकत म्यूवंपिं माओवादीया न्याम्ह कार्यकर्तातय्त आः सरकारय् वनाच्वंपिं नेतात नाप लिक्क लाःम्ह वाइसिएलया विशाल कार्कीं पुलिसतय्त ज्वंकाछ्वःगु दु । एकीकृत नेवाः राष्ट्रिय मुक्ति मोर्चा व ल्याय्म्ह पुचः येँया सांगठनिक क्षेत्र नं. १५या ग्वसालय् वइगु असोज ४ गते जुइगु टिकत म्यूवंगु इलय् माओवादीया बैद्य पक्षया कार्यकर्तात सुरेश सिलाकार, राजेन्द्र श्रेष्ठ, देवलामा, बाबु लामा व कुमार मगरयात ज्वंकाः छ्वःगु खः । छम्ह मनूयात टिकत म्यूवंगु इलय् उम्ह मनुखं विशालयात फोन याःगु, अले विशालं रुपेशयात फोन याःगु अले हाकनं रुपेशं वाइसीएलया सागरयात फोन याःगु खःसा सागरं बैद्य पक्षया कार्यकर्ता जूसा ज्वंकाः छ्वः धकाः आदेश बिइवं अथे विशालं इमित ज्वंकाः छ्वःगु खः धकाः सूत्रं धाःगु दु । अथे कार्यकर्तातय्त ज्वंकाः छ्वयेवं माओवादीया सांगठनीक क्षेत्र नं. १५ व १६ या कमाण्ड इन्चार्ज नापं जिल्लाया सह सेक्रेतरी सुरेश श्रेष्ठ हनुमानध्वाखाय् वनाः पार्टीया सांगठनीक क्षेत्र नं. १५ या ईन्चार्ज किरण शाही जिम्मेवारी च्वनाः त्वःताः हयेगु ज्या जूगु खः ।