'भातृ संगठनया नितिं सिन्हः तिके मजिउ’

येँ (झीगु स्वनिगः)

नेपाली कांग्रेसया भातृ संगठनत छु यायेगु धैगु विवादया खँ आः वयाः नेतातय्सं सार्वजनिक रुपं हे न्वंवानाहःगु दु । वंगु छुं दिं न्ह्यः जक नेपाली कांग्रेसया केन्द्रीय कमिटीया मुँज्याय् कांग्रेसया भातृ संगठनत नेपाल महिला संघ, नेपाल किसान संघ व नेपाल तरुण दल लगायतया संगठनया न्हूगु नेतृत्वया नितिं केन्द्रीय समिति भंग यायेमाः धकाः प्रस्ताव वःगु खः । कांग्रेसया बरिष्ठ नेता शेरबहादुर देउवां सिन्हः तिकाः भातृ संगठनया नेतृत्व बिइगु जुइमखु धकाः धयादीगु दु ।

९८ क्वःगु वीपी जयन्तिया लसताय् म्हिगः शनिवाः येँया जोरपाटी लागाय् याःगु समारोहलय् न्वंवासें नेता देउवां धयादीगु खः । नेता देउवां भातृ संगठनया अधिवेशन यानाः जक न्हूगु नेतृत्व ल्ययेमाः धकाः स्पष्ट यानादिल । कांग्रेस दुने भातृ संगठन विघटन यानाः न्हूगु अधिवेशनया माध्यमं न्हूगु नेतृत्व ल्ययेमाः धकाः संस्थापन पक्ष सभापति सुशील कोइराला, रामचन्द्र पौडेल, महामन्त्री प्रकाशमान सिंह लगायतया नेतातय्सं भूमिका म्हिताच्वंगु दुसा बरिष्ठ नेता शेरबहादुर देउवापक्षधर नेतातय्सं धाःसा भातृ संगठनयात विघटन मयासे हे महाधिवेशन यानाः न्हूगु नेतृत्व ल्ययेगु ज्या यायेमाः धकाः अडान तयाः वयाच्वंगु दु । उकिं कांग्रेस दुने नेतातय् दथुइ कचमच जुयाच्वंगु दु ।