जनसेनायात स्वलाया दुने विघटन यानाः चुनावय् वनेगु कांग्रेसया डिजाइन

येँ (झीगु स्वनिगः)

न्हूगु नेपालय् गणतन्त्र व राज्यं ल्यूने लाकातःपिं समुदायया भावना कथं जाति, भाषा, संस्कृति अर्थात पहिचानया आधारय् हक अधिकारया नितिं स्वायत्तता नापं स्वशासन सहितया संघीयता हयेगु नितिं १० दँ तक ज्यान पानाः ल्वाःपिं माओवादीया जनसेनायात विघटन यानाः न्हूगु चुनावय् वनेगु डिजाइन कथं नेपाली कांग्रेस न्ह्याः वनाच्वंगु दु । माओवादी जनसेनाया ल्वाभः तयातःगु कन्टेनरया ताःचा लःल्हायेगु ज्या विवादया दथुइ नं जुइ धुंकाः जक कांग्रेसया नेतातय्सं उगु कथंया डिजाइनयात खुलासा यानाहःगु दु । नेपाली कांग्रेसया केन्द्रीय दुजः महमद आफताभ आलमं म्हिगः शनिवाः जूगु छगू ज्याझ्वलय् ब्वति काये धुंकाः उगु कथं कांग्रेसया डिजाइनयात चाः हिइकाः उगु खँयात पुष्टि यानादीगु दु ।

विराटनगरय् संचारकर्मीतलिसे खँल्हासें कांग्रेसया केन्द्रीय नेता आलमं स्वलाया दुने संविधान निर्माण याये मफत धाःसा संविधानसभाया औचित्य समाप्त जुइगु अले न्हूगु जनादेशया नितिं चुनावय् वनेगु बाहेक मेगु विकल्प मदु धकाः नं धयादीगु दु । नेपाली कांग्रेसं एकीकृत माओवादीया लडाकुत दयाच्वतले नापं शान्ति प्रक्रिया पूरा मजूतले न्हूगु संविधान निर्माणया ज्या यायेगु जुइमखु धकाः स्पष्ट याये धुंकूगु अवस्थाय् छखे संविधानया निर्माण याके मबिइगु अले मेखे स्वयं कांग्रेससया नेतातय्सं स्वलाया दुने संविधान दयेके मफत धाःसा ताजा जनादेशय् वनेगु जुइ धकाः धयादीगुलिं कांग्रेसया धात्थेंयागु डिजाइन खुलासा जूगु दु धकाः मनूतय्सं टिप्पणी यानाहःगु खः । जनसेनायात विघटन याये धुनेवं एकीकृत माओवादी कमजोर जुइगु अले चुनावय् वन धाःसा माओवादीया साइज घटेजुइगु अवस्था दु धकाः विश्लेषण यानाः अथे कांग्रेसं भारतया योजना कथं हे डिजाइन यानाः न्ह्याः वनाच्वंगु खः धकाः टिप्पणी यानाहःगु दु ।