फेसबुक च्याट

सुधीर ख्वबि
'दिं लिपा चा , चा लिपा दिं छाय् ?' - जिं वयाके न्यना , फेसबुकया च्याट बक्सय् । 'सुख लिपा 'दुःख, दुःख लिपा सुख छाय् ?' न्ह्यसलय् न्ह्यसःतुं पिनाहल वं जिगु नुगःपाः । लिसः मब्युसें जि सुंक च्वना । जिगु मिखा अंगःया घडिइ द्युवन, १२ बजे जुइन । जिगुपाखें लिसः मवसेंलि पवनं खँ न्ह्यथना हल - 'सुखय् दुःख सुलाच्वंगु दइ थें दुखय् नं सुख सुलाच्वंगु दइ । अथेनतुं चां दिंयात, दिं चायात फिसःया पित्याः थें थःथवं लिलाकेतः जुयाच्वंगु दइ ।'
जि वयागु दार्शनिकता मथुया पलख अलमल जुल ।'सुनीताजु छु जुल छितः थौं - तसकं भावुक खने दुनि' वयागु च्यूतालं जितः नुगः दुने थ्यंक थ्यूगु थें जुल ।
'अँ' - जिं थुलि जक च्वया न्ह्यलय् हालाहःम्ह न्यादँ दुम्ह म्ह्याय्या ख्वाः छकः पुलुक्क स्वया ।
'छाय् छु जुल ?' - वं हाकनं न्ह्यसः ब्वल ।
जिं वयातः लिसः मखु न्ह्यसः तुं याना - 'चा लिपा दिं गुबलें मवयेमा, दिं लिपा चा मवयेमा, थ्व संभव जू ला ?'
'थपायेसकं वितृष्णा छाय् , जिन्दगी प्रति ?' - खँग्वःलय् अजूचाः ल्वाकज्याना वल ।
जिं हाकनं - 'अँ' जक धया ।
'ईया घःचाः खना ?' - मेगु न्ह्यसः ब्वब्वं - 'चा नं दिं थें छ्याये ज्यु' - वं जानकारी बिल ।
'दिं छ्यायेगु कला सयेकु सयेकुं चा वयेधुंकी , अले चा नाप म्वायेगु सयेकु सयेकुं दिं वयेधुंकी अथेजुयाः गुबलें मसयेका जिं ।'
'दिं नं चा थें म्वाये ज्यू नि' - हाकनं मेगु सुझाव छ्वया हल वं ।
उफ् ! जिं ताहाकः सासः ल्हाना गुलि जक हाले फूगु , वयागु च्वज्यायातः जिं खँल्हाःगु थें तायेका ।
'अले न्हूगु सुथ ?'
'पियाच्वना' - जिं धया ।
'अले सिन्चासिन्हःया सनिल गुलि झःझः धाः ?'
'जितः मसिल' - जिं खँ तना 'जिगु सनिल झःझः धाये न्ह्यः खिमिलाय् हिलावनी ।'
'जःया रंग मदयेक लसता गन दइ , जिन्दगीया स्वांक्यबय्' - म्हुतुप्वाः सुंक गन तयेफूम्ह मनू खः धकाः व । सायद नां थें च्वापुकाःम्ह ।
'जिं छुं हे मसिल' - जिं लाचारी प्वंका - 'जि म्हगसय् मखु यथार्थय् म्वाये यःम्ह मनू'
'यथार्थ गन तन ले सा खुया जकं यंकल कि ?' - वयागु च्वापुकाः पहःलं जितः दिक्क जू थें नं जुल ।
'पिया च्वना' - अथेसां लिसः बिया ।
'छि ला कवि थें च्वं' - वं ख्युंगु थासय् गोलिं कयेकेगु कुतः यात । छाय् खः मस्यू जितः न्हिले मास्ते वल ।
'छिगु मनोभावं जितः थथे जुलु - वं साबित यायेतः स्वल ।
'मच्वया जिं'- जिं खँ कुला - 'जितः ला पौ तकं च्वये मवः , गन कयाः च्वयेगु कविता जिन्दगीयात कयाः ।'
'सी मत थें कविता च्याकादिसँ, नुगःया ख्युँ बुलुं चिलावनी ।'
'सायद' - जि विश्वस्त जुइ मफुत ।
'डेफिनेटली' वं च्वल - 'मेगु धयादिसँ ।'
'छुं नं मदु'
'जिगु नुगलय् यक्व यक्व न्ह्यसःया लबु दना वयाच्वन, थ्व निरासाया हाकु सुपाँय् छाय् ?' - वयागु न्ह्यसः मदी ।
'छाय् थ्व न्ह्यसःया बाः ?' - जितः दिक्क जुयावल, थ्व नं ला छम्ह मिजं हे खः नि , थःगु ख्वाः उलाः हल का , जिं बिचाः याना ।
'निरासा मखु आसा, आसा जक' - जिं जोड याना ।
'निरासा दुनेया आसा ?'- वयागु न्ह्यसः उघ्रिमय् वल ।
'मखु' - जि न जिराहा जुया क्यना थःगु खँय् ।
'मखुसा छु ले सा ?'
'ग्व जितः नं मसिल' - जिं च्वयागु खँय् जितः हे झर्को चाःगु वाः चाल । न्हूम्ह पासा, वयागु बारे खासै छुं खँ मस्यु जितः । छक्व निक्व च्याट यानाया वयागु खँ ल्हाइगु पहः जितः बाँलाः ताल , सायद मनू नं, वैचारिक रुपय् । प्रायः

बहनी लिबाक्क तक्क अनलाइन खना जिं । अले जि नं प्रायः लिबाक्क तक्क अनलाइन च्वना हे च्वनेगु । च्याटया क्रम शुरु जूगु कारण थ्व नं जुइफु ।
'अनम्यारिड खः ला ?' - जिं आकाझाकां न्ह्यसः छुना ।
'नो' - वं इमान्दारिता क्यन , जितः बाँलाः ताल । पलख व लिसे ख्याः याये मास्ते वल ।
'अनम्यारिड जूसा.......' - जिं खँग्वः त्वःफिका आलपं हे । तर वं स्यू जि न्यादँ दुम्ह म्ह्याय् दु धकाः ।
'अनम्यारिड जूसा..... छु ?' - वयागु जिज्ञासां घेरे यात जितः ।
'छुं नं मखु' जिं खँ हीका ।
अचानक हे छगू न्ह्यसः बम मुइकूगु थें च्वंक न्यन, वं जिके - 'हब्बी छु यानादी ले ?'
'छु थ्व हब्बी धाःगु ?' - थूसां मथु पहः याना वइके तुं न्यना । जिगु न्ह्यसलय् सायद कठोरता महशूस यात वं ।
'हजबेन्ड धयागु का' - थःगु न्ह्यसः प्रति वयात गुडफील मजुल सायद । तर थ्व न्ह्यसलं जितः छाय् न्ह्याबलें लित्तुलिना च्वनी - थ्व खँ जितः कने हे मास्ते मवः । भाःतया खँ न्ह्यःने वलकि जि मर्माहत जुइगु सिबें आक्रोशय् वइगु ।
जिं च्वया छ्वया - 'सु भाःत, छु भाःत ?' जिगु प्रतिक्रियां सायद व अवाक जुल । जिगु आक्रोशयात महशूस यात जुइ । च्याटबक्सय् शून्यता ब्वल ।
'आई आएम सरी' - वं च्वयाहल ।
न्ह्यसः न्यना वं द्वंकूगु ला मखु तर जिगु प्रतिक्रियां वइतः गल्तिबोध जुइकाबिल । जिगु अतीतया खँ जिं सुयातं मकना , न्ह्यसः धस्वानाच्वनी तर म्होयात जक सत्य, यक्वसितः मखुगु खँ ल्हानागु दु । छाय्धाःसां छगू न्ह्यसःया लिसः लिपा

सलंसः न्ह्यसः वइ , जिं स्यू थ्व खँ ।
'सरी अगेन' - वयागु गल्तिबोधया झ्यातूगु कु दिका बीमाःथें जुल ।
'पवनजु जिन्दगी थथे हे खः, वयात जिके थासं लाका यंकल बाय् व थः हे लायेकाः यंकल भुतुमालि थें । थ्व खँ जिं सुयात नं मकना'
- जिं थःगु घाः हाकनं प्वला । 'अथेसा जितः नं मकंसा ज्यूनिसा' - व अझ नं असहज तिनि, सायद
'छाय् खः मकंसे च्वनेमफुत छितः' - जिं नालाःकया सत्ययात ।
'छि व छिम्ह म्ह्याय्या किपातय् जिं लसता मखना , जिं खंके हे माःगु जिगु नजरया दोष थें ताल जितः । जिं छाय् खंकेमफुत व ख्वालय् लसताया जः ? जिं खंके हे माःगु' - व पस्ता चायाच्वन अझ नं ।
'आई हेट ड वर्ड हज्बेंड मनुखँ थःम्हं थःतः गुलि जक हेय्काः च्वनेर्फइ ?' - जिगु खँग्वः हाकनं आक्रामक जुल 'सो हृवाट टु डु... ?'
'माया धैगु फ्वना , लाकाकया वा ख्वयां दइला गनं ? जिं थथे हे याना दुःख बिया कलाःजुया थः भाःतयात... सो आई हेट ड वर्डस् हज्बेंड एण्ड वाईफ ... तर जिं छु याना बाँलाःगु हे ज्या याना... जिन्दगीइ... जि छगू तःधंगु निर्णय यायेत

सफल जुया...न ल्वापु न ख्यापु... न अंश न मुद्दा, जिम्ह म्ह्याय् जि नाप दु ड्याट्स अल....जिन्दगी न्ह्याबलें किचकिच याना म्वानाच्वनेगु स्वयां छगू तःधंगु निर्णय यायेगु हे बुद्धिमानी जुइगु जुयाच्वन, न्ह्याक्व हे पीडा जूसां... ।'-

ल्यापटपया डिस्प्ले बुल्लुसे च्वनावल । मिखाय् ख्वबिया पर्दा च्वनाबिल मचायेक हे ।
'धयादिसँ, जिं न्यनाच्वना छिगु जिन्दगीया भ्वखाय्या सबतु - पवन मर्माहत जूगु जुलं । आखःग्वः थुरथुर खाःगु थें जुल जितः ।
'चाहे मचायेक मिखा प्यानावई गुबलें गुबलें... अले जि ख्वय् ह्वायेंह्वायें, तर याकचा हे अनं बिचायाये जिके यक्व दोष दु' जिं कटकट स्यानावःगु नुगः प्वःच्युच्युं प्वंका पीडाया रंग ।
'जिगु अभिव्यक्तिं छाय् छिगु नुगः थिल, जिं थुइकाच्वना' - पवनं च्वयाच्वन । जि घाः प्वलेतः तयार जुया ।'जन्म जुया लसता धैगु गुजोगु धकाः सीकेगु इलय् थः मांनाप विछोड...सुयांगु ल्हाः ज्वना न्हूगु जीवन न्ह्याकेगु इलय् जीवनपासानापं बायेमाल ... अनं खने मदुगु , ल्याःचाः तयेमफूगु यक्व यक्व विछोड तःगुमछि । जितः आः नं लुमःनि फलय् फ्यतुना गुलिखे बहनिं तिमिला स्वस्वं यः मां धकाः ख्वयागु...धात्थें जि पुन्हिया चाय् गुलि ब्वाँय् जुइगु .... मांयात खनिला धकाः , जि चीधिकःबले ।जिम्ह मांयात म्हासुगु कापतं त्वःपुया यंकुबले, जितः लुमः, जिं जिम्ह मांयात गन यंकूगु धकाः न्यनाबले जितः सुनां खः हुंकन तिमिला दुगु थासय् यंकुगु धकाः लिसः ब्यूगु । तर जिं छाय् धकाः न्यने हे मफुत । जितः थौं नं चा धालकि तसकं यः । पुन्हिया चा ला झन हे यः । तिमिलाय् जिं जिम्ह मांया ख्वाः यक्व हे लुइका कायेगु याना जिं । अथेजुया तिमिलालिसे नुगःया ख्युं हिलाबुला यायेगुया मज्जा अलग हे दु खनिसा । पीडा प्वंकाः नुगः पलख जक हे याउँसे च्वनिगु जक खः, मेगु छुं जुइगु मखु । अथेजुया जिं सुयागु नं न्ह्यःने थःगु दुःख मब्वया । दुःख प्वनेधुंका हाकनं नुगलय् वहे दुःख हाकनं जाइगु छाय्... थौं इलं जितः छाय् खः थ्व मौका बिल... थ्व झिजांमिजां दंगु चाय्... छुं छुं खँ पिज्वल नुगःचुदुनें...बस् । नुगः दुःखया मुहान जुइगु जुया च्वन गुकीं जिन्दगी नं चुइकाः यंकीयः हाःनाः मदयेक । न्ह्याबलें लबु थें दनावयाच्वनीगु भावनाया थ्व मुहानयातः पलख जक कुनेफूगु भ्रम जुइ, गुबलें गुबलें...व इलय् लसता भय्बिया झी उन्मत्त जुइ...तर चा हे मचायेक थ्व मुहान गुबले लबु जुयाः दनावइकी उबले गनं ध्याकुने सुपिलाः ख्वबिं म्ह छम्हं वाच्यावाच्यां प्याक्क ख्वयेतः बाध्य जुइ थ्व आत्मा... ।'
व मौन, छुं नं च्वया महः सायद जिगु घाः खना स्तम्भित जुल - 'छाय् सुंक ?' - जिं न्यना ।
'मखु' - व व्यथित नं जुल सायद, स्वांया दुखय् नुगः ख्वइगु खँ ल्हाइम्ह मनू
'ह्वाट हापेंण्ड' - जिं न्यना ।
'आई आएम शक्ड ! , स्पीचलेस जिन्दगीया भोगाई छाय् थुलि दर्दनाक जुइगु जुइ ?'
'इट्स माई लाइफ... डेयर आर सो मेनी मिस्टेरिज...!'
'जिं थुल छिगु जिन्दगीया बाखं, भोगाई व पीडात आः - न्हूगु यात्राय् न्ह्यज्यायेगु मखुला ?'
पवनया अनुरोध ।'छु न्ह्यज्याई आः न्हूगु यात्राय् थ्व त्यात्या छ्याछ्या जूगु थ्व नुगलय् भावनाया तरंग निषेध जुइधुंकल । जिलिसे जिम्ह म्ह्याय् दु , जिगु जिन्दगी जिगु यात्रा आः व नाप जक ।' ...पवन सायद अफलाइनय् वने धुंकल जुइमाः । बिना गुडबाई , बिना गुडनाईट सायद... जक धायेफू जिं ...!

More Stories Like this