अल्पकालीन राहत घोषणा
कब्जा सम्पत्ति लित बीगु / भ्रष्टाचार विरोधी युनिट दयेकीगु
येँ (सन्ध्या टाइम्स)/प्रधानमन्त्री डा. बाबुराम भट्टराईया सरकारं थौं अल्पकालीन राहत ज्याझ्वः घोषणा यात। सिंहदरवारय् प्रम लगायत मेमेपिं नं मन्त्रीतय्गु उपस्थितिइ अर्थमन्त्री वर्षमान पुनः तत्काल राहतया ज्याझ्वः ब्वनाः न्यंकादीगु खः। अल्पकालीन राहत ज्याझ्वलय् द्वन्द्वकालय् कब्जा यानाः आः तक लित मबिसे तयातःगु फुक्कं निजी व सार्वजनिक सम्पत्ति लित बीकेगु व उकिया निंतिं स्थानीय प्रशासन कार्यालयतय्त निर्देशन बीगु खँ नं दुथ्याः ।
अथे हे माओवादी जनयुद्ध, जन आन्दोलन, मधेश अन्दोलन, जनजाति आन्दोलन, थरुहट आन्दोलन, दलित तथा पिछडावर्ग आन्दोलन व मेगु समुदायया न्यायोचित मागया निंतिं जूगु आन्दोलनय् सीपिं सहिद, बेपत्ता जूपिं परिवार, घाःपाः जूपिं, अपाङ्ग जूपिनिगु नितिं निर्देशिका दयेकाः आः वइगु मोहनि न्ह्यः हे विशेष राहत बीगु, सत्य निरुपण तथा मेलमिलाप आयोग व बेपत्ता मनूतय्गु (कसुर तथा सजाय) सम्बन्धी विधेयकत १५ न्हुया दुने व्यवस्थापिका संसद्पाखें पारित यायेगु व अनं लिपा हे सम्बन्धित आयोगत गठन यायेगु, सशस्त्र द्वन्द्वया झ्वलय् कब्जा याना तःगु सार्वजनिक नापं निजी छेँ जग्गा सम्बन्धित पक्षयात तत्काल हस्तान्तरण याकेत स्थानीय प्रशासनयात निर्देशन बीगु, थ्व ज्याय् छुं नं कथंया समस्या वल धाःसा उकिया अध्ययन यानाः माःगु विकल्पसहितया समाधान यायेत उच्चस्तरयि कार्यदल दयेकाः वःगु सुझावया आधारय् स्वलाया दुने ज्या क्वचायेकेगु, नेपाली सेनाया लोकतान्त्रिक संरचना व राष्ट्रिय तथा समावेशी चरित्र निर्माण जुइगु संवैधानिक व्यवस्था कथं नेपाली सेनाय् ब्यागलं इकाईया रुपय् मधेसी समुदायया पहिचान स्थापित यायेत झिद्वःम्हेसित भर्ना माग याःगु सन्दर्भय् तत्काल हे निश्चित संख्याया भर्ना प्रक्रिया न्ह्याकेगु, अन्तरिम संविधान व प्रचलित कानून कथं अःपुक नागरिकता इनेगु व थुकी पंगः वल धाःसा तुरुन्त हे ज्यंकेगु, सुशासन व भ्रष्टाचार नियन्त्रण, सार्वजनिक सेवायात समावेशीकरण यायेत न्हापाया विधेयकयात मधेशी, जनजाति, थारु, दलित, मिसा व मेपिं हकदार समुदायया मागयात ध्यानय् तयाः परिमार्जन यासें १५ न्हुया दुने संसदय् न्ह्यब्वयेगु खँ नं धयातःगु दु ।
भ्रष्टाचार नियन्त्रण यायेत प्रधानमन्त्री कार्यालय मातहतय् विशेष भ्रष्टाचार विरोधी युनिट दयेकेगु व उकिं सरकारी कार्यालयय् जुयाच्वंगु अनियमितता बारे सर्वसाधारणया गुनासो मुंकाः कारवाही न्ह्याकेगु खँ न्ह्यथना तःगु दु ।
अथे हे राजमार्गय् सुरक्षा क्वातुकेत, प्रत्येक ५० किलोमिटरय् सुरक्षा पोष्ट तयेगु, अय्लाः त्वनाः गाडी चले याइपिंत कारवाही यायेगु, निजी ज्याय् छ्यालातःपिं सुरक्षाकर्मीत चीकेगु , किसानयात अःपुक त्यासाया व्यवस्था यायेगु, फोहोर व्यवस्थापनय् पंगः थनीपिंत कारवाही यायेगु, न्यासःम्ह नेपाःमियात रोजगारी बीगु उद्योगय् सुरक्षाया निंतिं न्याम्ह प्रहरी तयेगु, रिक्सा चालकयात रिक्सा धनी दयेकेत सहुलियतं त्यासा बीगु, अय्लाः चुरोस निश्चित पसलं निश्चित उमेरया मनूतय्त जक मी दइगु व्यवस्था यायेगु खँ नं धयातःगु दु ।
