माओवादीया न्याम्ह नेता नापं हे गोरखाय्
येँ (सन्ध्या टाइम्स)/लडाकुया ल्वाभः तयातःगु कन्टेनरया ताःचा लःल्हाःगु खँयात कयाः माओवादी दुने तःधंगु हे कचवं पिहां वयाच्वंगु इलय् लाक्क थौं पार्टीया न्याम्ह मुख्यपिं नेतात गोर्खाय् वंगु दु ।
१२ क्वःगु सुरेश वाग्ले स्मृति सभाय् ब्वति कायेत अध्यक्ष प्रचण्ड, उपाध्यक्षपिं प्रधानमन्त्री डा. बाबुराम भट्टराई, मोहन बैद्य, उपप्रधानमन्त्री नारायणकाजी श्रेष्ठ प्रकाश व महासचिव रामबहादुर थापा बादल उखेपाखे वंगु दु।
माओवादी दुने ल्वापु तच्वयाच्वंगु समाचार वयाच्वंगु हे इलय् नेतातय् दथुइ ल्वापु मदु व पार्टी तज्याइ मखु धइगु अभिव्यक्ति कार्यकर्तातय्त बीत न्याम्हं प्रमुख नेतात थौं गोरखा वंगु टिप्पणी यानाहःगु दु ।
माओवादीया न्याम्हं शीर्ष नेतात वइगु जुइवं गोरखाय् जुइगु सभाया नितिं तयारी नं तःजिक याःगु दु। गांगामं मनू ल्ह्यया हःगु दु। उगु लागाय् सुरक्षा ब्यवस्था तकं कडा याःगु दुसा ब्यापक रुपं सुरक्षाकर्मी नं परिचालन यानातःगु दु ।
