मनू स्याःगु द्वपनय् तरुण दल नेता ज्वन
येँ (सन्ध्या टाइम्स)/नेपाली कांग्रेसया भातृ संगठन नेपाल तरुण दल चितवन शाखाया अध्यक्ष शिव पौडेल नापं स्वम्ह कार्यकर्तायात प्रहरीं हत्या व आक्रमणय् स्वापू दुगु द्वपनय् ज्वंगु दु। पौडेल नापं तरुण दलया प्रमोद राई व राजन धइम्ह छम्हेसित नं ज्वंगु खः। येँया कलंकी लिक्क वंगु चान्हय् इमित प्रहरीं ज्वंगु खः। इपिं विरुद्ध चितवन प्रहरीइ लानाच्वंगु ज्यान मार्ने उद्योग व आक्रमण याःगु किटानी जाहेरी लाःगुलिं प्रहरीं ज्वंगु खः ।
पौडेल नापं छगू दर्जन मनूयात वंगु भदौ १२ गते कविलासय् एमालेया भातृ संगठन युवा संघया संजय लामायात गोलीं कयेकाः स्याःगु व २१ गते युवा संघया हे केन्द्रीय दुजः कमल पाठकयात सांघातिक आक्रमण याःगु द्वपं बियातःगु दु। ज्वंपिं तरुण दलया नेता व कार्यकर्तातय् बारे प्रहरीं अनुसन्धान न्ह्याकूगु दु ।
