बसन्तपुली छक्वलं सछिगः धाः थाइगु
येँ (सन्ध्या टाइम्स)/थुगुसी यँलाया झ्वलय् लाकाः बसन्तपुली धाः बाजंया तःजिगु ब्वज्या याइगु जूगु दु। उदाय् समाजया ग्वसालय् जुइगु उगु धाः ब्वज्याय् धाः बाजं सम्बन्धी थीथी प्रयोग समेत जुइगु खँ धाःगु दु। उकी धाःयात गितार लिसे फ्युजन यानाः न्ह्यब्वयेगु लिसें थौंकन्हय् लोप जुइगु अवस्थाय् थ्यनेधुंकूगु संगिनी ग्वरा थानाः क्यनेगु खँ नं ग्वसाः खलकं धाःगु दु ।
ब्वज्याया छगू प्रमुख आकर्षण कथं छगू हे इलय् सछिगः धाः थानाः न्ह्यब्वयेगु ग्वसाः दुगु खँ नं धाःगु दु। असं त्वाःया उदाय पुचलं उगु ब्वज्या याइगु खः। उकी न्यागू उदाय् पुचःतय्सं धाः ब्वज्या याइगु खः। धाः बाजं नेवाःतय् पुलांगु बाजं खः। थुकियात थौंकन्हय्यात नं ल्वयेक न्ह्यागु तालय् नं थाये जिउ धकाः क्यनेगु ज्या नं अन जुइगु खँ धाःगु दु ।
