सरकारयात थःगु हे पार्टीपाखें खतरा

प्रधानमन्त्री डा. बाबुराम भट्टराईया सरकारयात सुंपाखें खतरा दुसा व थःगु हे पार्टीया विरोधी खेमापाखें दुगु खँ पिहां वःगु दु। खास यानाः पार्टीया वरिष्ठ उपाध्यक्ष मोहन वैद्य पक्षं यदि प्रधानमन्त्री लिसे थःपिनि खँ मिले मजुल धाःसा वय्कःया सरकार विघटन यायेगु तकया पलाः ल्ह्वने माली धकाः तयारी समेत यानाच्वंगु समाचार पिहां वःगुलिं प्रम भट्टराईया सरकारयात थःगु हे पार्टी दुनें खतरा दुगु अनुमान जुया वःगु खः ।

प्रधानमन्त्री भट्टराई व पार्टी अध्यक्ष प्रचण्ड जानाः माओवादीया लडाकुयात समायोजनया नामय् आत्मसमर्पण याकेत्यंगु द्वपं उपाध्यक्ष वैद्य पक्षं बियाच्वंगु दु। थौंकन्हय् माओवादी दुने दकलय् तःधंगु विवाद थुकी हे जुयाच्वंगु खः। थ्व खँयात कयाः थौंकन्हय् माओवादी करिब निकू टुक्रा हे जुइधुंकूगु खः ला धइगु स्थितिइ लानाच्वंगु खनेदु। तर माओवादीइ ब्वलंगु थ्व विवाद न्हापा लिपा थें सिद्धान्तया खँयात कयाः जूगु विवाद मखु। थ्व पार्टीया ल्वाभः ल्ह्वनीपिं लडाकुतय् खँयात कयाः जुयाच्वंगु विवाद खः। छुं जुयाः थ्व विवाद भड्के जुया वन धाःसा उकिया लिच्वः लडाकुतय्त समेत लाः वनीगु निश्चित दु। लडाकु भड्के जुल धाःसा उकिया लिच्वः चाहिं माओवादी दुने जक मखु मुक्कं देशय् हे न्यना वनीगु खँयात सुनां नं ल्वःमंके मजिउ। थज्याःगु गम्भीर खँयात कयाः थःगु हे पार्टीया सरकार क्वःथलेगु तकया तयारी जुयाच्वन धायेबलय् थ्व गुलि गम्भीर अवस्थाय् थ्यनेधुंकल धइगु खँ अथें नं अनुमान यायेफु। लडाकुलिसे स्वानाच्वंगु थ्व विषययात न्हापा लिपा थें हल्का कथं कायेगु पाय्छि जुइ मखु। नेतृत्वं अवश्य नं बिचाः यायेमाली ।

More Stories Like this