मोहनकृष्ण डंगोलया 'विधि हे विपरित जुसेंलि...'
इ. मोहनकृष्ण डंगोलयात नेवा: समुदाय दुने म्हसिका च्वनेम्वा: । वय्क: ज्यापु महागुथि येँ महानगर समितिया वर्तमान नाय:लिसें महागुथि सहकारीया नाय: अले थीथी नेवा: संघसंस्थाया थीथी पदय् च्वना: नेवा:तय्गु उत्थानया नितिं सक्रिय जुयाच्वनादीम्ह छम्ह समाजसेवी ख: । वय्क: नेपालभाषा साहित्य ख्यलय् नं दखल दुम्ह ख: धका: धा:सा यक्वसिनं मस्यू जुइफु ।
वय्कलं २०१५ सालंनिसें हे त्वा:त्वालय् न्ह्याइगु थीथी दबु प्याखं च्वया: स्यनेज्या नापं यानादीगु दु । वय्क:या मनू म्हसीकि, आ: जिल का:, थम्हं म्हुयागु गा:, मांया हि, न्हूगु समाज, स्वैत छु य: ? थज्या:गु सामाजिक क्रान्तिं जा:गु प्याखंतय्गु चर्चा थौंतक नं ज्याथपिनि म्हुतुं न्यनेदनि । उगु दबू प्याखनय् हालात:गु म्ये नं उतिकं लोकंह्वानाच्वंगु दनि ।
आधुनिक सञ्चारं थ्व ख्य: भचा ल्युने ला:गु खयेफु तर थौं नं दबूप्याखंया स्वाद थूपिं मनूतय्गु म्हो जूगु मदुनि । नाटक ख्यलय् थुकथं थ:गु ग्यसुला:गु उपस्थिति न्ह्यब्वयादीम्ह नाटककार इ. मोहनकृष्ण डंगोलं ता:र्इया दिपा: लिपा नकतिनि जक न्हूगु उपन्यास ज्वना: हाकनं थ:गु मांभाय्या सेवाय् पला: न्ह्याकादीगु दु । गुगु उपन्यासया नां ख: – 'विधि हे विपरित जुसेंलि...' ।
थुगु सफू काचाक्क स्वयेबलय् अष्ट व मंगलाया मतिनाया बाखं थें खनेफु । तर थुकिइ दुब्वना: स्वयेगु ख:सा थ्व छगू सामाजिक न्हाय्कं जुइत ता:ला:गु दु । गुगु छगू बांला:गु उपन्यासय् दयेमा:गु आधारभूत आवश्यकता ख: ।
थनया समाजय् न्यनाच्वंगु भ्रष्टाचार, पदीय मर्यादा व अधिकारया दुरुपयोग अले संविधानसभा थुज्व:गु मर्यादित संस्थाया निष्कर्मन्यता थुगु सफुतिइ छ्याताहां उलात:गु दु । सफुतिइ ब्वयात:कथं मूपात्र अष्ट छम्ह कर्तव्यनिष्ठम्ह सरकारी कर्मचारी ख: । मङ्गला अष्टया मतिनामि – गुम्ह छम्ह यौनपिपासुया कुदृष्टिइ लाना: दुगु गर्भपाखें दुम्ह मचायात बुइकूगु कारणं याना: समाजपाखें अपहेलित जुयाच्वंम्ह मिसा । थुकथं हे मेपिं पात्रकथं अष्टया मां, मंगलाया त:मां, मंगलायात लहिनात:म्ह म्हय् – लत्मां प्रमुखकथं न्ह्यब्वयात:गु दु ।
सफुतिइ लत्मांयात छम्ह इमान्दारम्ह म्हय्कथं न्ह्यब्वयात:गु दु गुम्हसिनं मङ्गलायात समाजं हाकुत्यूसां थ: त:सिं जूगु व वया अबुजुया हुनिं हे थ:पिनिगु परिवारया उत्थान जूगु गुणयात लुमंका: मङ्गला व वया काय्यात थ:गु शरण बियात:म्ह ख: । सफूया विशेषताकथं जिं न्हाच: हे न्ह्यथने धुन थुकी समाजया न्हाय्कं उलात:गु दु, अष्ट व मङ्गलाया मतिनाया बाखं, उमिगु मिलन व वियोगयात तसकं मार्मिक व नाटकीय ढंगं न्ह्यब्वयात:गु दु ।
वय्क: नाटककार जूगुया दसि थुकी दुगु छुं छुं नाटकीय ब्वं नं स्पष्ट या: गथे सफूया लिपांगु ब्वपाखे मङ्गलां थ:म्हं बांमला:गु म्हगसय् खनेव मेघराज (सुपाँय्)यात थ: यज्जु याकनं छेँय् हयेत इनाप याइगु व पाल्पाय् चान्हय् हे सरकार परिवर्तन जुइत्यंगु सुचं थ्यना: इपांथिपां मदयेक अष्ट लिहाँ वइगु नाटकीयतां उपन्यासय् रोमाञ्चकता तनाब्यूगु दु । अष्ट लिथ्यने न्ह्य: अष्टया मामं छगू पार्टीया झ्वलय् काकिम्हेस्यां मेपिनि धालखँय् लाना: कंगु खं याना: छेँ नं पितनीगु व मचा बुइकेत अस्पताल थ्यनीबलय् मङ्गलायात मचाछेँया क्यान्सर दुगु खँ सी दइ । तर थ: यज्जुयात ब्यूगु बचंकथं मङ्गलां मचायात जन्म बिइ अले अस्पतालया बेडय् होस वइबलय् अष्टयात खना: थ:गु पवित्रता प्रमाणित जुइवं वयागु देह त्यागया दु:खान्त बियोग नं न्ह्यथनात:गु दु ।
नेपा:या राजनीति स्थीरं च्वने मफुगु व जनताया इच्छाकथं न्हूगु नेपा:या निर्माण यायेगु नितिं जूगु तारन्तारया हिउपालं तकं देसय् स्थीरता हयेमफुगु प्रति नं वय्कलं च्यूता: प्वंकादीगु दु । थुकथं हे संविधान निर्माणया नितिं संवैधानिक चुनाव हे याना: ६०० लं मयाक संविधान सभासद् ल्यया: २ दँया दुने दयेके धका: तातुंगु नं फय्गं सावित जुजुं वनाच्वंगु प्रति वय्कलं दु:ख प्वंकादीगु दु ।
नेपा:या धार्मिक सहिष्णुताया चर्चा यासें देश धर्म निरपेक्ष धका: घोषणा यातं नं थुकिया संवैधानिक सुनिश्चितता मदुगु खँय् नं आपत्ति प्वंकादीगु दु । स्वला प्यलां हे सरकार हिलीगु व मूलमुद्दायात ध्याकुनय् लाकीगु खँ नं उपन्यासय् ब्वयात:गु दु । उपन्यासय् रत्न शाक्यया किपा देव:कथं तयात:गु दु । गुकिं समग्र बाखंयात कय्च्यानाच्वंगु खनेदु । छुं दिं न्ह्य: हे जक आैपचारिक घोषणा जूगु प्रेम–मोहन सिरपा: गुथिं पिथंगु थुगु सफू न्हापांखुसी न्यास:गू जक पिथंगु ख: ।
मुक्कं २४० पेज दुगु सफूया मू १००/– तका क्व:छिनात:गु दु । उपन्यासकार डंगोलं थुज्व:गु हे ग्यसुला:गु उपन्यास भविष्यय् नं च्वयादी धइगु भलसाकासें भिंतुना देछानाच्वना ।
News Location:
More Stories Like this
छगू भाषं जक जुयाच्वंगु प्रचारं लिच्वः पिदनी मखु स्याङ्जाया ७० दँया मेघनारायण मानन्धरया नुगः खँ नेपालभाषायात नेवारभाषा गुबले निसें धाल ? ख्वपया नमूना चण्डेश्वरी पर्वतय् नेवाः भाय् सम्वन्धी पर्वतया ९२ दँया सरस्वती श्रेष्ठया नुगः खँ
