सिक्किमय् इन्द्रजात्रा न्यायेकीगु

सांस्कृतिक ब्वज्या व बाखं गोष्ठी नं जुइगु

सिक्किमय् सिक्किम नेवाः गुथिया ग्वसालय् वंगु झिदँ न्ह्यवंनिसें न्यायेका वयाच्वंगु इन्द्रजात्रा थुगुसी नं न्यायेकीगु जूगु दु ।

वइगु यंलाथ्व चतुर्दशी (भाद्र २५ गते) इन्द्रजात्रा कुन्हु सिक्किमया राजधानी गान्तोकय् अनया हनेबहम्ह मुख्यमन्त्री डा. पवन चाम्लिङ मूपाहाँ कथं झाइगु ज्याझ्वलय् अनया नेवाःतय्सं कुमारी जात्रा, लाखे प्याखँ व थीथी बाजं थानाः देय् चाःहिली । सलंसः मूतय्सं ब्वति काइगु थुगु जात्राय् स्वनिगलं नं नेवाःतय्सं ब्वति काइगु जूगु दु ।

ताः ई न्ह्यवं निसें सिक्किमलिसे स्वापु ब्याका च्वानादीम्ह संस्कृतिकःमि गणेशराम लाछिया संयोजकत्वय् छगू पुचः उखे वनेत्यंगु खः । वय्कःया संयोजकत्वय् बाजं थाइपिं भ्वँतया गुम्ह कलाकार, प्याखँ हुलीपिं मध्यपुर कला परिषद, थिमिया निम्ह कलाकार, म्ये हालामिपिं पवित्र कसाः व दिपा महर्जन नापं गोरखापत्र न्हिपौया संवाददाता यलु जोशी व नेपालमण्डल डटकम पाखें ज्ञानकुमार महर्जनपिं शुक्रवाः (भाद्र २३ गते) गते उखेपाखे वनीगु ज्याझ्वः दु ।

थ्वया नापं बाखँ दबूया नायः लक्ष्मण राजवंशीया नेतृत्वय् बाखँच्वमिपिं प्रा. नर्मदेश्वर प्रधान, राजा शाक्य, शशिकला मानन्धर, डा. सर्वोत्तम श्रेष्ठ, केदार सितु, गोविन्दमान श्रेष्ठ, विमला शाक्य, शरद कसाः, कृष्णभक्त बोडे, मोहिनी चित्रकार व बद्री वेदनापिं नं साहित्यिक ज्याझ्वः बाखं गोष्ठीया निंतिं उखे वनीगु जूगु दु ।

सिक्किम नेवाः गुथिया ब्वनाय् वनेत्यंगु थुगु पुचलं इन्द्रजात्रा कुन्हु सांस्कृतिक ज्याझ्वः व येँया पुन्हि कुन्हु साहित्यिक ज्याझ्वः बाखं गोष्ठी याइगु ख: ।

More Stories Like this