प्रमया सल्लाहकारत नियुक्त

देवेन्द्र पौडेल राजनीतिक, रामरिझन प्रेस सल्लाहकार

* राष्ट्रिय पोशाकया निर्णय खारेज
* समावेशी विधेयक लित काइगु
* मोहनि न्ह्यः हाकुबन्जाःतय्त कडाई
* राहत प्याकेज हयेत मन्त्रीतय्त जिम्मा

येँ (सन्ध्या टाइम्स)/थौं सुथय् च्वंगु मन्त्रिपरिषद् बैठकं प्रधानमन्त्रीया राजनीतिक सल्लाहकारय् माओवादी पोलिटब्यूरो दुजः देवेन्द्र पौडेलयात नियुक्त याःगु दु। अथे हे प्रेस सल्लाहकारय् केन्द्रीय दुजः राम रिझन यादवयात नियुक्त याःगु दु ।

मन्त्रिपरिषदं राष्ट्रिय योजना आयोगया उपाध्यक्ष दिनेशचन्द्र देवकोटां बिउगु राजीनामा स्वीकृत यासें उकिया थासय् पुलांम्ह गभर्नर दीपेन्द्र बहादुर क्षेत्रीयात नियुक्त याःगु दु। देवकोटां वंगु वालय् राजीनामा बियादीगु खः।
अथे हे आयोगया दुजलय् जनक शाह व शिवकुमार राईयात नियुक्त याःगु दु। सरकारया प्रवक्ताय् उपप्रधान नापं परराष्ट्रमन्त्री नारायणकाजी श्रेष्ठयात नियुक्त याःगु दु ।

सरकारं जनतायात राहत बीगु कार्यक्रम हयेत न्याम्ह मन्त्रीतय्त जिम्मा बिउगु दु। उपप्रम श्रेष्ठया नेतृत्वय् दयेकूगु उगु समितिया दुजलय् भौतिक योजना तथा निर्माण मन्त्री हृदयेष त्रिपाठी, उर्जामन्त्री पोष्टबहादुर बोगटी, स्वास्थ्यमन्त्री राजेन्द्र महतो व अर्थमन्त्री वर्षमान पुनः च्वनादीगु दु। कार्यदलं कन्हय् हे राहत कार्यक्रमयात अन्तिम रुप बीगु खँ धाःगु दु ।

बैठकं संसद दुने विवादय् लानाच्वंगु सार्वजनिक सेवायात समावेशी दयेकेगु सम्बन्धी विधेयक लित कयाः आः उकियात संशोधन यानाः जक पेश यायेगु निर्णय नं याःगु दु ।

अथे हे सार्वजनिक ज्याझ्वलय् दौरा सुरुवाः (राष्ट्रिय पोशाक) अनिवार्य रुपं पुना वयेमाः धकाः माधव नेपालया सरकारं यानातःगु निर्णय खारेज यायेगु निर्णय नं याःगु दु।
प्रधानमन्त्री भट्टराई असोज २ गते १३ सदस्यीय पुचः ज्वनाः संयुक्त राष्ट्रसंघया महासभाय् ब्वति कायेत न्युयोर्क वनीगु ज्याझ्वःयात नं थौंया मन्त्रिपरिषदं स्वीकृत याःगु दु। परिषदं परराष्ट्र मन्त्रालयया कामु सचिवय् दुर्गा भट्टराईयात नियुक्त याःगु दु ।

थ्वहे दथुइ प्रधानमन्त्री डा. बाबुराम भट्टराईं थौं हे पत्रकार सम्मेलन मार्फत घोषणा यायेगु धकाः तयारी यानातःगु विशेष राहत प्याकेज प्रति मधेसी मोर्चाया मन्त्रीतय्सं असन्तुष्टि प्वंकूगु दु। थुकिं यानाः उगु घोषणा कन्हय् जक याइगु जूगु दु। प्रम भट्टराईं तयार यानादीगु राहत प्याकेजय् मोहनि, स्वन्ति व छठ पर्व न्ह्यःने हाकुबजाः व कृत्रिम अभाव सिर्जना याइपिंत निगरानी तयेगु, सरकारी अस्पतालय् निःशुल्क बेड आरक्षित यायेगु, निजी अस्पतालय् नं निश्चित ल्याखय् निःशुल्क बेडया ब्यवस्था यायेगु, द्वन्द्वकालय् पीडिततय्त नं राहतया बीगु प्रस्ताव दुथ्याः ।