सरकार क्वःथलेगु वैद्य पक्षया तयारी?
येँ (सन्ध्या टाइम्स)/प्यखेरं वाहवाही जुयाच्वंम्ह प्रधानमन्त्री डा. बाबुराम भट्टराईया सरकार पिने तसकं लोकंह्वाःसां नं थःगु हे पार्टी दुनेया कचवंया कारणं विघटन जुल धाःसा अजूचायेम्वाः। यदि अज्याःगु हे जुल धाःसा भट्टराई सरकारयात क्वःथलेगु तकया तयारी वय्कःया हे पार्टीया मेम्ह उपाध्यक्ष मोहन वैद्य किरण पक्षं यानाच्वंगु खँ सीदुगु दु ।
विज्ञ सूत्रं बिउगु जानकारी कथं यदि प्रधानमन्त्रीलिसेया थःपिनि बिचाः तसकं पाना वन व शान्ति प्रक्रियाया नामय् आत्म समर्पण यायां वन धाःसा सरकारं संसदय् हइगु न्ह्यागुसां छगू विधेयकया पालय् थःगु पक्षया सकलें सभासद्त अनुपस्थित जुयाः विधेयक असफल याना बीगु तकया तयारी वैद्य पक्षं यानाच्वंगु दु। विधेयक असफल जुल धाःसा सरकार अल्पमतय् लाःगु ठहर जुइ व अज्याःगु अवस्थाय् सरकारं स्वतः राजीनामा बी माली। अज्याःगु 'मुभ' तक याये मालीगु अवस्थायात ध्यानय् तयाः किरण पक्षं थौंकन्हय् संविधानसभा दुने थःगु पक्षय् ग्वःम्ह सभासद् दु धकाः सीकेत हस्ताक्षर मुंकेगु ज्या यानाच्वंगु खँ धाःगु दु ।
सरकार गठन याये न्ह्यः माओवादी व मधेसवादी मोर्चाया दथुइ सम्झौता यायेत वैद्य पक्षया सुयातं जानकारी तकं मबिसे अध्यक्ष प्रचण्ड व उपाध्यक्ष बाबुराम भट्टराई निम्ह जक सुतुक्क वनाः हस्ताक्षर याना वःगु द्वपं वैद्य पक्षं बियाच्वंगु दु ।
