माओवादी बैठक हानं लिज्याइगु जुल
येँ (सन्ध्या टाइम्स)/कन्टेनरया ताःचा विशेष समितियात लःल्हाःगुलिं तच्वयावःगु विवाद समाधान यायेत सःतूगु माओवादीया केन्द्रीय बैठक लिछ्याइगु जूगु दु। प्रधानमन्त्री नापं पार्टी उपाध्यक्ष डा. बाबुराम भट्टराई असोज २ गते राष्ट्रसंघीय महासभाय् ब्वति कायेत अमेरिकाया न्यूयोर्कय् वने माःगुलिं असोज १ गतेनिसें च्वनेगु धयातःगु बैठक स्थगित यायेत्यंगु खः धाःगु दु। उकिया नितिं माओवादीया अध्यक्ष प्रचण्डं थौं सनिलय् पार्टीया केन्द्रीय कार्यालय पेरिसडाँडाय् केन्द्रीय पदाधिकारीया बैठक सःतादीगु दु। पदाधिकारी बैठकं वइगु असोजया निगूगु वालय् केन्द्रीय कमिटीया बैठक तयेगु विषयय् सहलह जुइ धाःगु दु। अथे हे तत्कालीन बैकल्पिक पोलिटब्यूरो दुजः सुरेश वाग्लेया कन्हय् गोरखाय् जुइगु स्मृतिसभाय् वनेगु बारे नं सहलह जुइ धाःगु दु। तत्कालिन अवस्थाय् माओवादीया नेता वाग्लेयात किलो शेरा टु अप्रेशनया झ्वलय् २०५५ सालया भदौ २३ गते प्रहरीं स्याःगु खः ।
