येँयाःया निंतिं निसःम्ह स्वयम् सेवक
येँ (सन्ध्या टाइम्स)/थुगुसी येँयाः नखःयात व्यवस्थित रुपं हनेत येँयाः जात्रा ११३१ समन्वय समितिं निसःम्ह नेवाः स्वयम्सेवक परिचालन याइगु जूगु दु ।
थौं सुथय् थनया क्षेत्रपाटी पार्टी प्यालेसय् च्वंगु समन्वय समितिया छगू बृहत मुँज्यां उगु निर्णय याःगु खः।
नेवाः जागरण मञ्च व समन्वय समितिया संयोजक सुजीव वज्राचार्यया सभापतित्वय् जूगु भेलाय् येँयाःया झ्वलय् जात्रा हनीगु दुनेया लागाय् लाःगु क्लब, संघसंस्थां थःगु संस्थापाखें स्वय्मसेवकत परिचालन यायेगु निर्णय याःगु खःसा आपालं ल्याय्म्हतय् उपस्थिति दुगु उगु भेलां वइगु यंलाथ्व चतुर्दशि व पुन्हि (भाद्र २५ व २६ गते) क्वःनेयाः व थःनेयाः कुन्हु अथे हे भाद्र ३० गते नानिचायाःया न्हि कुमारी, भैरव व गणेशया खःयात पूर्णरुपं सुरक्षा प्रदान यायेगु निर्णय याःगु दु ।
समितिया भेलां कुमारी खःया निंतिं स्वयम्सेवक परिचालन भाला नेवाः जागरण मञ्चया राजेश्वर स्थापितयात बिउगु दुसा भैरव खःयात सुरक्षा बीगु भाला स्टार क्लवया नायः चन्द्र कुमार महर्जन व गणेश खःया सुरक्षा भाला गंगा क्लवया नायः दिगम्बर श्रेष्ठयात बिउगु दु। वय्कःपिं स्वम्हेसियागु नेतृत्वय् स्वयम्सेवक परिचालनया लिसें सुरक्षा, ट्राफिक प्रहरीलिसें आकस्मिक व्यवस्थाया समन्वय यायेगु भाला नेवाः जागरण मञ्चया संयोजक सुजीव वज्राचार्य, खड्गी सेवा समितिया नायः मनोज नेवाःयात बिउगु दु ।
भेलाय् समन्वय समितिया उपसंयोजक मनोज नेवाः, जागरण मञ्चया राजेश्वर स्थापितयालिसें थीथी क्लव व संघसंस्थाया प्रतिनिधितय्सं थःगु नुगःखँ तयादीगु खः। लिसें जनसेवा प्रहरी प्रभागया इन्चार्ज कवित कटवालं येँयाः जात्राया निंतिं प्रभागपाखें याये त्यनागु सुरक्षा व्यवस्थायात कयाः जानकारी बियादीगु खः। ज्याझ्वलय् सुभाय् क्षेत्रपाटी क्लवया न्वकु सत्यनारायण डंगोलं बियादीगु खः ।
