जनविद्रोहया लाइन त्वःतूगुहे खःला ?

अमीर ताम्रकार

एकीकृत नेकपा -माओवादी) थःगु पार्टीया न्वकू डा. बाबुराम भट्टराईया नेतृत्वया सरकार दयेकूगु लगत्तै अन्तराष्ट्रिय क्षेत्रं विशेष यानाः साम्राज्यवादी अमेरिका व विस्तारवादी भारतं चाहे जूथें ल्वाभः तयातःगु कन्टेनरया ताःचा लःल्हानावीवं देशय् दुनेया संसदवादी नेपाली कांग्रेस एमालेंनिसें अमेरिका व भारतं नाप लसता प्वंकाः प्रधानमन्त्री डा. भट्टराईयात भिंतुना वीगु यानाहःगु दु । माओवादीयात आतंकवादीया धलखय् तयातःम्ह अमेरिकापाखें भिंतुना कायेखंगुलिं डा. भट्टराईया नाप नापं पार्टीया नायः प्रचण्डया नं ख्वालय् न्हिलासू पिज्वःगु स्पष्टहे खनेदु । छगू ताःहाकःगु प्रकृयां न्ह्याः वनाः अन्तिम इलय् जक कन्टेनरया ताःचा लःल्हायेमाःगु यात कयाः पार्टी दुने जक मखु, अन्तराष्ट्रिय ख्यलय् नं माओवादीं गनं शसस्त्र विद्रोहया लाइन हे त्वःतूगु मखुला धकाः न्ह्यसः थनाहःगु दु । अन्तराष्ट्रिय कम्युनिष्टतय्गु सञ्जाल रिम नापं थप शंका यानाहःगु दु । न्हापाहे माओवादीयात पितिनेगु मनोस्थिति दयेके धुंकूगु उगु सञ्जालं वैद्यपक्षं ल्होना वयाच्वंगु शसस्त्र विद्रोहयाहे कारणं माओवादीयात पिमत्यूगु सन्दर्भय् आः हत्थासं कन्टेनरया ताःचा लःल्हानावीवं इमिसं थप शंका याइगु नं अस्वभाविक मखु ।

सशस्त्र विद्रोह व जनविद्रोह आः सम्भव मदु धाइपिं नं मदुगु मखु । तर कम्युनिष्ट पार्टीं शसस्त्र विद्रोह वा सशस्त्र संघर्षयात त्वःतेवं व सर्वहारावर्गया नेतृत्व वा गरिव निमुखा जनताया स्वार्थयात तिलाञ्जली वीगु ज्या जूवनी व उगु पार्टी कम्युनिष्ट पार्टी मजुसे वुर्जुवा पार्टीइ रुपान्तरित जुइगु खँ स्वभाविक खः । नेपालय् थीथी कम्युनिष्ट पार्टीत दुसां रिमय् इमिगु सुयागु नं प्रतिनिधित्व मजूगु कारण नं थ्वहे खः ।
कम्युनिष्ट धयापिं सामान्य सुधार वा संसदीय लंपुं राज्यसत्ता कायेफै धयागु खँय् विश्वास याइमखु । ल्वाभः दुगु राज्य सत्ता नापं ल्वायेत थःपिंके नं ल्वाभः दयेहेमाः व शसस्त्रया माध्यमं जक सर्वहारा वर्गया अधिकार प्रतिस्थापित यायेफै धइगु खँय् विश्वास याइ । थ्व खँयात सुनां आत्मसातयात व कम्युनिष्ट जुइसा, सुनां त्वःतल व कम्युनिष्टया नामय् छ्द्मभेषी जुइ, सुधारवादी जुइ, संशोधनवादी जुइ । ल्वाभः धयागु मोह यायेगु चीज मखु, राज्य सत्तायात ल्हातय् कायेत छगू मदयेक मगाःगु साधन खः । आवश्यकता खः । कम्युनिष्टतय्त नं हिंसा हत्या मयः । तर राज्य सत्ता धयागुहे हिंसा चलय् जुइगु यन्त्र खः । हिरायात चायेत हिराहे माःथें राज्य सत्तायात फाता पुइकेत, वनाप ल्वायेत कम्युनिष्टतय्के नं ल्वाभः दयेहेमाः । विना ल्वाभलं व्यवस्था फाता पुइके मफैगुलिं व्यवस्थाया विरुद्ध ल्वायेत कम्युनिष्टतय्सं नं ल्वाभः तयेमाः, जनसेना दयेकेहे माः । थुगु मूल्य व मान्यतां स्वये वलय् वर्तमान प्रधानमन्त्री डा. भट्टराइ व पार्टीया नायः प्रचण्ड पिसं जनविद्रोहयात त्वःतूगुहे खःला धकाः भान परे जुइगु नं स्वभाविक खः । ताःचा हत्थासं छाय् लःल्हात ? वैद्य पक्षयापिसं जक मखु, विश्वया सारा कम्युनिष्ट पार्टीपिसं न्ह्यसः थनेगु याना हःगु दु ।

साम्राज्यवादी अमेरिकां निसें देशय् दुनेच्वंगु संसदीय पार्टीत नेपाली कांग्रेस एमाले लगायत दलतय्सं संविधानया खँ त्वःताः मात्रै सेना समायोजनया खँ जक ल्होना च्वंगु दु । माओवादीयात जनसेना व ल्वाभलं व्यागलं तयाः थःपिथें निसस्त्र जुइकेत स्वयाच्वंगु दु । थुकिया छगू जक कारण माओवादीयात ज्या मछिंकेगु व पेले यायेगु मानसिकता खः । माओवादीयात जनसेना व शस्त्रविहिन मयाःतले पेले यायेफैमखु धयागु इमिगु सोच खः । थुकियाहे झ्वलय् आः इमिसं वाइसिएल भंग यायेगु, लाका कयातःगु धाःगु छेँ, बुँ लितवीमाःगु थःगुहे कथंया सेना समायोजनया प्रकृयाय् न्ह्याः वनी । अले प्रधानमन्त्री डा. भट्टराइ व पार्टीया नायः प्रचण्ड नं उगुहे कथं विरोधीतय्सं छु छु धाल अथ्य अथ्यहे यानाः विश्वासय् कयाः सरकारय् सहभागी याकेत स्वइ । धाः धाः यायेगु व विरोधीतय्गु पाखे स्याबास कायेगु मनोस्थितिया विकास जुइवं थःपिनिगु पूर्व अडान छुं नं ल्यनी मखु, व शत्रुतय्त लय्तायेकाः न्ह्यःने वनी । लचकताया नामय् माओवादीया पूर्व अडानत धमाधम त्वःतु त्वःतुं प्रधानमन्त्री भट्टराइपिसं माओवादीयात कांग्रेसया भाइ, वा एमालेयाहे हाराहारीइ थ्यंकेत स्वइगु तःधंगु सम्भावना दु ।

ताःचाया खँ सामान्य थें खंसां यथार्थ् थःपिनिगु सैद्धान्तिक मान्यतां पिहां वनेगुया शुरुवात खः । पार्टी दुने ताःचा ल्हाल्हायेगु खँय् स्थाइ समिति व केन्दि्रय समितिं प्रकृयाय् वने्गु जक स्वीकृति वियातःगु यात ताःचा लःल्हायेत हे स्वीकृति जुइधुंकूगु धया सफेद झूठ खँ ल्हानाः गुगुकथं पार्टी, कार्यकर्ता व सर्वसाधारण जनतायात भ्रम वियाच्वंगु दु थ्व झूठं पार्टीयात गन थ्यंकीगु खः धाये थाकु । मखुगुयात नं खः धायेगु, मजूगुयात नं जू धायेगु, थुगुकथंया झूठया खेती यानाः ताःचा लःल्हाःपिसं धात्थेंला नेपाली क्रान्तियात दथुइहे त्वःतेगु षडयन्त्र जुयाच्वंगु जक मदुला । सिद्धान्तत शसस्त्र जनविद्रोहया खँय् प्रधानमन्त्री डा. भट्टराइ व पार्टी नायः प्रचण्डं स्वीकार याःसां प्यख्यरं दुनेनिसें थुकियात त्वःतूगु अनुभूतियाना हःगु दु । कन्टेनरया ताःचा लःल्हानाः थुगु खँया पुष्टि याये धुंकूगु दु । जनसेनायात सेना समायोजनया गुलिख्य खँया निर्धारणहे मजुइकं कन्टेनरया ताःचा विशेष समितियात लःल्हाना वीवं वर्तमान जनसेनाला लङ्गरा यानाविल । शस्त्र विहिन सेनाय् रुपान्तरित यानाविल । आः सेना सम्वन्धी छुंनं खँ माओवादीं धाःथें मखु, नेपाली कांग्रेस, एमाले जक मखु विदेशीतय्सं धाःथें व चाहे जूथे जुइ । साम्राज्यवादी व विस्तारवादीतय्गु स्यावासी नयेगु वानी परेजुलकि थ्व वानी यात नं प्रधानमन्त्री डा. भट्टराईं त्वःते फै नत पार्टीया नायः प्रचण्डंहे ।

सेना समायोजनया प्रकृया न्ह्याः मवंकं कन्टेनरया ताःचा लःल्हानावीवं आः सेना समायोजनया प्रकृयाय् नं पार्टीया अडान कमजोर जुइ व विपक्षीतय्गु खँ निणर्ायक रुप काइ । विना संविधान सेना समायोजनया छुंहे औचित्यता मदु । सेना समायोजनयात अधिकारिक रुप धयागुहे न्हूगु संविधानया निर्माण खः । संविधान निर्माणया ग्यारेन्ति मजुइकं सेना समायोजनय् वनेहे मज्यू । सम्मानजनक सेना समायोजन धयागु हे न्हूगु संविधान निर्माण यानाः, प्रचलित समायोजनया अन्तराष्ट्रिय मापदण्ड छ्यलेगु खः । सेनाय् व्यक्तिगत मखु सामुहिक प्रवेश खः । छाति नापय् याकाः मखु, अनुभव, योग्यता लगायत खँया आधारय् प्रवेश खः । जनसेनायात वन जंगल व उद्योगया पालेया रुपय् मखु, सीमा रक्षकया रुपय् कार्यक्षेत्र क्वछीफयेमाः । संख्या नं ७-८ द्वःया जःखः जुइमाः । थ्व दक्को खँया छुंनं निर्णय जूगुहे मदुनि । माःगु खँ छु क्वमछीगु अले हत्थासं ताःचा लःल्हायेगुया अर्थ छु जुल ? आत्म समर्पणवादी सोचय् कुहां वनेगु खः ।

कन्टेनरया ताःचा लःल्हानाः आः हानं उकियात लित कायेगु खँ जुइमखु, तर हत्थासं ताःचा लःल्हाःपिसं पार्टीया निर्णय विपरित ताःचा लःल्हायेलात गल्ति जुल धकाः आत्मालोचना यायेमाः । शसस्त्र जनविद्रोह त्वःतागु मदुनि, क्रान्तिप्रति घात यानागु मदु धकाः इमान्दारी पूर्वक व्यवहारं क्यनेफयेमाः । सत्ताया नितिं विपक्षीतय्गु स्यावासी नयेत स्वयेमज्यू । क्रान्तिया नितिं सस्त्र विद्रोह अपरिहार्य खः, थुकियात त्वःतेगु वा कमजोर यायेगु ज्या नेपाली जनतायात सह्य जुइमखु । क्रान्ति पूमवंनि, क्रान्त्रि न्ह्यानांच्वंगु दु । थुकिया विरुद्ध वनीपिन्त इतिहासं गवलेंनं गनंनं क्षमा याइमखु ।

More Stories Like this