राहतया ज्याझ्वः मवयेकं विजुलीया भाः थकाइन

नेपालय् ज्या मयासे मात्रै हाजिर यानाः तलव पाकय् याइगु थीथी सरकारी, निगम व कार्यालयत मध्ये छगू खः, विद्युत महशूल निर्धारण आयोग । विजुलीया भाः गुलि प्रतिशतं थकायेगु धयागु गवलें गवलें जक मालीगु ज्याया नितिं थ्व आयोग दयेका तःगु खः । वंगु झिदँ थुखे विजुलीया भाः थकाःगु मदु व थ्वहे कारणं वंगु झिंदँनिसें थुजिं स्यानाः तलव पाकय् यानावयाच्वंगु विद्युत महसुल निर्धारण आयोगं धाःसा थुगसी भाः क्वछीगु ज्या वःगु दु । झलनाथ खनाल प्रधानमन्त्री जुयाच्वं वलय् अर्थ व उर्जा मन्त्री जुयादीम्ह भरतमोहन अधिकारीं संसद मार्फत ज्यामवःगु आयोगयात खारेज यानावीत स्वःगु खः । थुयालिपा उर्जामन्त्रीइ गोकर्ण विष्ट वयेवं विजुलीया भाः थकाये धाधां अथेंहे वन । आः उर्जामन्त्रीइ माओवादीया पोष्टबहादुर वोगटी वःगु दु । वयकःयाहे पहलय् आः विजुलीया भाः थकायेगु तयारी यानाच्वंगु दु ।
सरकारं वइगु लच्छिया दुने विजुलीया भाः थकायेगु घोषणा याःगु दु । वइगु मोहनि वा स्वन्तिया जःखः विजुलीया भाः थकाइगु खनेदु । यथार्थय् नेपाल विद्युत प्राधिकरणं विजुलीया भाः थकायेमाल धकाः धयावयाच्वंगु यक्को दत । हालावःथें सरकारं भाः थकाःगु खःसा म्होनिं निक्वः वा स्वक्वः भाः थाहांवल नं जुइ । तर भाः थकायेगुतुं प्राधिकरणया द्यापं चिलीला ? न्ह्यसः दनावःगु दु । नेपाल आयल निगमं थें द्यात धाधां भाः जक अप्वयेकेगु ज्या यायेमज्यू । छगू ला विजुलीया आपूर्ति उलि बांलाक्क मजू, लोडसेडिङ्गया मारं जनता मुक्ति मदु, मेख्य लोडसेडिङ्गया इलय् न्यूनतम ध्यबा कायेमज्यू धकाः सः थ्वयेका हयाच्वंगु अवस्थाय् विजुलीया भाः थकायेगु उपयुक्त मखु ।

नेपाल आयल निगमथें नेपाल विद्युत प्राधिकरण नं थीथी आन्तरिक समस्यां ग्रस्त दु । प्राधिकरण दुने अधिकतम भ्रष्टाचार दु, चुहावत दु, माक्कोयासे अप्व कर्मचारीत दु, सामान खरीद, ठेक्कापत्ता आदिइ अनियमितता दु, मतच्याकाः नं ध्यबा मपूपिं अज्ज नं ल्यंदनि, गाडी न्यानाः नं करपिसं उकिया दुरुपयोग याइगु । पुलांगु उर्जामन्त्री विष्ट वयेवं छुं सुधारया कुतः यानादीगु खः । विजुली च्याकाः नं दँ व दँ निसें ध्यबा मपूपिनिगु लाइन चानावीवं आः ध्यबा पुलाः जक मत च्याकेगु प्रकृया न्ह्याकावीवं करौडौं लाखौं ध्यबा मपू पिसं नं वुलुं ध्यबा पुलेगु यानाहःगु दु । थुज्वःगु हन्ता जुयाच्वंगु ध्यबा व चुहावत जक पनेफुसां प्राधिकरण द्याये माःगु अवस्था वइमखु धकाः विज्ञपिनिगु सुझाव वयेक वयेकं नं उकियात लोमंकाः भाः थकायेगु नीति पाय्छि मदु । न्हापा भनसुन यानाः लाखौं घुस नकाः प्राधिकरणया कार्यकारी निर्देशक नियुक्ति याइगुलि प्राधिकरणया इतिहासय् दकले न्हापां प्रतिस्पर्धां वःगु दु । चुहावत नियन्त्रणय् कर्मचारीत खटय् जुयाच्वंगु दु, ध्यबा मपूपिनिगु लाइन चानाच्वंग्ु दु । थुज्वःग अवस्था धयागु सुधारया लँपुइ प्राधिकरण वनाच्वंगुया संकट खः । प्राधिकरणया घाटा २७ अर्व ध्यबा थ्यंसां थुकियात छक्वलं छगूहे मलाखं चीकेफैमखु ।

दच्छिया ६ अर्वया घाटा आः थत्थे अन्त्य मजूसां भ्रष्टाचार व चुहावत जक पनेफत धाःसा छुं छुं दँ दुने द्यापं च्वनेम्वालीगु प्रष्ट दु । सरकारं राहतया ज्याझ्वः हयेत्यंगु अवस्थाय् भाः थकायेगु ज्या न्ह्याकेगु धयागु आम जनतायात थप मार वीगु खः । वजार भालं कष्टपूर्ण जीवन हनाच्वंपिं नेपाःमितय्त विजुलीया भाः थकायेवं थप कष्ट जुइगुलिं प्राधिकरण भाः थकायेगु पाखे मवंसे विकल्पत मालेगु वुद्धिमानी जुइ ।

More Stories Like this