सरकार असफल जुयाःवनाच्वंगु दु : संचारमन्त्री

येँ (झीगु स्वनिगः)

वर्तमान सरकारया सूचना तथा संचार मन्त्री जयप्रकाशप्रसाद गुप्तां आःया अवस्थाय् सरकार हे असफल जुजुं वनाच्वंगु दु धकाः दावी यानादीगु दु । म्हिगः बुधवाः पत्रकारतलिसे खँल्हासें संचारमन्त्री गुप्तां सरकार गठन जूगु झिन्हु दये धुंकूगु अवस्थाय् नं मन्त्री परिषद्या मुँज्या तकं च्वने फयाच्वंगु मदु धकाः अथे असन्तुष्टि प्वंकाः थः हे मन्त्री जूसां नं सरकारया आलोचना यानादीगु खः । मन्त्री परिषद्या मुँज्या च्वने सफुगु धैगु हे सरकारया असफलता खः धकाः दावी यानादिसें वय्कलं १५ न्हुया दुने समावेशी विधेयक परिमार्जन यानाः संसदय् पेश यायेगु, कुटनीतिक व संवैधानिक नियुक्तिया नितिं नां प्रस्ताव यायेगु व तत्काल जनतायात राहतया ज्याझ्वः हयेगु धकाः जूगु सहमति कथं ज्या जुइ मफयाच्वंगुलिं असन्तुष्टि तकं प्वंकादिल ।

सरकार निर्माणया झ्वलय् एकीकृत माओवादी व मधेसवादी मोर्चाया दथुइ प्यंगू बुँदाया सहमति जूसां आः तक नं मन्त्री परिषद्यात तकं पूर्णता बिइ मफया अलमल जुयाच्वन धकाः नं स्पष्ट यानादिल । संचारमन्त्री गुप्तां शान्ति प्रक्रिया नाप स्वापू दुगु समायोजन जुइपिं लडाकुया ल्याः, मोडालिटी, दर्जा व पुनःस्थापनाया प्याकेज थें जाःगु विषयसं आः तक नं मूमू राजनीतिक दलया दथुइ विवाद हे जुयाच्वंगु अवस्थाय् सहमति मजुयाः समय जक ववार्द जुयाः वनाच्वंगु नापं स्वलाया दुने न्हूगु संविधानया मस्यौदा दयेकेगु ज्याय् तकं प्रभाव लानाः वनाच्वंगु दु धयादिल ।