नेपाःया छुँ हंगकंगय् मालाच्वन
येँ (सन्ध्या टाइम्स)/नेपाःया राष्ट्रिय ध्वजावाहक नेपाल वायुसेवा निगमया विमानय् दुहां वंम्ह छुँ मालेगु ज्या आः हंगकंगय् जुयाच्वंगु दु। छुँ दुसां म्हिगः हंगकंग ब्वःगु उगु विमानयात आः हंगकंग एअरपोर्टय् तुं तयाः छुँ मालेगु ज्या जुयाच्वंगु दु। हंगकंगया एअरपोर्टं छुँ पत्ता लगे मजूतले विमानयात त्वःता महइगु खँ धाःगु दु। छुं जुयाः छुँ मालेगु लागिं माःगु फुक्क उपाय नालेधुंकाः नं मलुल धाःसा विमान दुने छुँ च्वनीगु सम्भावना दुगु विमानया पार्टपुर्जा तकं फुक्कं हे खोले यानाः छुँ मालीगु खँ नं धाःगु दु ।
नेपाल वायुसेवा निगम सूत्रं धाः कथं थौं सुथंनिसें हंगकंगय् छुँ मालेगु ज्या जुयाच्वंगु दु। यदि पार्टपूर्जा खोले याये माल धाःसा मेगु छन्हु निन्हु ई अझ कायेफुगु खँ नं धाःगु दु। हंगकंगय् छुँ लु हे लूसां नं वं छुं क्षति नं याःगु दु लाकि धकाः पूर्ण रुपं चेक अप यानाः जक विमान त्वःता हइगु खँ नं धाःगु दु। विमान उडानया सवालय् हंगकंगया कानून अतिकं कडा माने यानातःगु दु ।
येँय् विमानय् दुहां वंम्ह छुँयात म्हिगः गम तयाः ज्वनेगु ज्या याःगु खःसा कर्मचारीतय्सं उकिया फोटो नं खिचे याःगु खः। वयां लिपा नं विमानय् छुँ खने दत धाःगुलिं विमान दुने निम्ह वा व स्वयां छप्वः छुँ दयेमाः धकाः नं अनुमान याःगु दु ।
लिम्बु लिहां वयेवं तनाव
विमानय् छुँ दुहां वनाः हैरान जुयाच्वंगु इलय् मेखे नेपाल वायुसेवा निगमय् धाःसा सरकारं बर्खास्त याःम्ह पुलांम्ह महाप्रवन्धक केबी लिम्बू सर्वोच्चय् मुद्दा त्याकाः हानं दुहां वःगुलिं मेगु तनाव ब्वलंगु दु। म्हिगः अफिस वःम्ह लिम्बुयात कर्मचारीतय्सं हाजिर मयाकुसे लित छ्वया बिउगु खः। थौं धाःसा लिम्बु ज्याकुथी हे मवः। न्हापा अदालतं मुद्दा त्याका वःम्ह कार्यकारी अध्यक्ष सुगतरत्न कंसाकारयात लिम्बुं हे हाजिर मयाकुसे न्हापां सरकारया निर्णय ज्वना वा, अनं लिपा बोर्डं निर्णय यानाः जक दुकायेगु धकाः लित छ्वया बिउगु खः। आः निगमया कर्मचारीतय्सं लिम्बुयात नं वहे प्रक्रिया पूवंकाः जक ज्याकुथी वा धकाः लित छ्वया बिउगु खः ।
प्रक्रिया पूवंकेगु लागिं दकलय् न्हापां सर्वोच्चं मुद्दा त्यात धाःगु जानकारी पर्यटन मन्त्रालययात वये माल। वयां लिपा मन्त्रालयं वयात हानं पुनर्वहाली यानागु निर्णय याइ। उगु निर्णय बारे सचिवं निगमयात जानकारी बी। वयां लिपा निगमया बोर्डं उकियात हानं स्वीकृति यानाः जक ज्या याके बी ।
