थुगुसी हाथुद्यः नं झःझः धाइ

येँ (सन्ध्या टाइम्स)/दँय्दसं यँयाःया झालय् जक सार्वजनिक याइगु हनुमानध्वाखाया हाथुद्यः (स्वेत भैरव) थुगुसी न्हापा स्वयां झःझः धायेक पिलू वइगु जूगु दु। कारण, गुथि संस्थानं पित हे मबिसे तयातःगु थ्व द्यःया फुक्कं तिसा थुगुसी पित बीगु जूगु दु। कन्हय् सुथय् १० बजे गुथि संस्थान केन्द्रीय कार्यालय, भद्रकाली शाखा व तहसिलपाखें उगु तिसा हाथुद्यःया पाःलाःयात लःल्हाइगु ग्वसाः दु ।

द्यःपाःलाःतय्सं धाः कथं गुथि संस्थानं 'सुरक्षा' या कारण क्यनाः उगु तिसा पित मबिसे तयातःगु ३५ दँ दयेधुंकल। तःदँ न्ह्यवंनिसें तिसा बीगु लागिं गुलि इनाप यातं नं संस्थानं मबिसे तयातःगु खःसा थुगुसी पुलांम्ह मन्त्री हिसिला यमिया पहलय् तिसा बीत्यंगु खः। द्यःपाःलाः सुनिल ताम्राकारं कनादी कथं संस्थानयाके छु छु तिसा दु धइगु खँ सी मदुनि। करिब छगू ट्यांका ति दयेमाः धइगु अनुमान दु। कन्हय् तिसा लःल्हायेवं हे द्यःयात तिसां तिकेगु सुरु जुइ। थुगुसी पर्यटन वर्षयात नं ध्यानय् तयाः हाथुद्यःयात तिसां तिकाः झःझः धायेकेत संस्थानं तिसा बीत्यंगु खँ धाःगु दु ।