माओवादी तज्याइ धकाः पूर्व एकताकेन्द्रया नेतात चिन्तित
येँ (सन्ध्या टाइम्स)/एकीकृत माओवादी दुने लाईन संघर्षया झ्वलय् विवाद जूगु कन्टेनरया ताःचा लःल्हाःगु प्रकरणं यानाः आः पार्टी हे तज्याइगु जकं खः लाकि धकाः पुलांपिं एकताकेन्द्र मसालया नेतात चिन्तित जूगु दु ।
एकता यानाः माओवादीइ दुहां वःपिं नेतात अमिक शेरचन, लिलामणि पोखरेल, सोनाम लामा, दिलबहादुर श्रेष्ठ, घनश्याम पौडेल, कमानसिंह लामा, लिसें मोहन विक्रम सिंहया जनमोर्चां वःम्ह दिलाराम आचार्य लगायतया नेतात थौंकन्हय् पार्टी बचे यायेत माओवादीया स्वम्हं शीर्ष नेतात अध्यक्ष प्रचण्ड, उपाध्यक्षपिं मोहन बैद्य व डा. बाबुराम भट्टराईयात नापलाः वनेत्यंगु दु। नारायणकाजी श्रेष्ठ प्रकाश छम्ह पार्टीया अध्यक्ष पक्षय् खुला रुपं वनाच्वंगुलिं नं एकता केन्द्रया पुलांपिं नेता कार्यकर्तातय्त ज्या मछिनाच्वंगु खँ सूत्रं धाःगु दु ।
थ्वहे झ्वलय् माओवादी एकता अभियानय् क्रियाशील थ्व नेतातय् दथुइ थौं सहलह मुँज्या च्वनेत्यंगु दु। एकता अभियानय् क्रियाशील जुयाच्वंपिं नेतातय्सं स्वम्ह हे शीर्ष नेतातलिसे अनौपचारिक रुपं सहलह ब्याके धुंकूगु दुसा आः पुचः हे वनाः पार्टी एकताया नितिं कुतः याइ धाःगु दु ।
