आः बहनी नं अदालत
येँ (सन्ध्या टाइम्स)/सर्वोच्च अदालतं येँया जिल्ला अदालतय् सन्ध्याकालीन अर्थात् चान्हय्या अदालत नं नीस्वनीगु जूगु दु। वइगु साउनंनिसें बहनीया ५:३० निसें ८ ताः ई तक सञ्चालन जुइकथं तयारी जुयाच्वंगु सर्वोच्च अदालतं जानकारी बिउगु दु ।
नियमित कार्यालय इलय् अदालतय् उपस्थित जुइ मफुपिं सेवाग्रहीतय्गु सुविधा, न्यायय् जनताया सहज पहुँच व अदालतय् अप्वयाच्वंगु कार्यबोझयात आधुनिक व सुविधाजनक रुपं व्यवस्थापनया निंतिं थुज्वःकथंया रात्रि अदालतया अवधारण न्ह्याकूगु खः धाःगु दु। येँ लागा धुंकाः मुद्दाया अप्वः चाप दुगु ततःधंगु शहर विराटनगर, राजविराज, जनकपुर, वीरगञ्ज, भैरहवा व नेपालगञ्जय् नं थुगु सेवा विस्तार याइगु जूगु दु ।
सर्वोच्च अदालतया न्यायाधीश ताहिर अली अन्सारीया संयोजकत्वय् गठन जूगु उगु समितिं रात्रि अदालतया स्थापना सम्बन्धी प्रतिवेदन प्रधानन्यायाधीश खिलराज रेग्मीयात लःल्हायेधुंकूगु दु। प्रतिवेदन सर्वोच्चया पूर्ण बैठकय् न्ह्यब्वयेगु निंतिं रजिष्ट्रारयात निर्देशन बीधुंकूगु सहायक प्रवक्ता हेमन्त रावलं जानकारी बियादीगु दु। आः च्वनीगु सर्वोच्चया पूर्ण बैठकं सन्ध्याकालीन (रात्रि) अदालत स्थापना नियमावली संशोधन यानाः पारित यायेत सरकार समक्ष पेश याइगु खँ नं सीदुगु दु। थुगु रात्रि अदालतयात जिल्ला अदालतयात बिया वयाच्वंगु क्षेत्राधिकार बीगु जूगु दु ।
