हानं पिहां वःगु आयोग गठनया विवाद
राज्य पुनर्संरचना सम्बन्धी ज्याया निर्णय यायेत आयोग हे निर्माण यायेगु खः लाकि विशेषज्ञतय् पुचः जक गठन यायेगु खः धइगु खँयात कयाः हानं मेगु विवाद पिहां वःगु दु। खास यानाः नेपाली कांग्रेस दुने विशेषज्ञतय् पुचः मखु, आयोग हे गठन यायेमाः धकाः छुं दुजःतय्सं सः तयाच्वंगु कारणं थुकिया बारे निर्णय याये फयाच्वंगु मदु। आयोग गठन यानाः ज्या याका च्वनेबलय् ताःई काइगु जूगुलिं विशेषज्ञतय् पुचः गठन यानाः वयागु राय जक काये माली धकाः वःगु सुझावयात माओवादीं नं सामान्यतया स्वीकार याये धुंकूगु दुसा आः यदि सकलें सहमत जुल धाःसा अज्याःगु पुचः गठन नं याइगु सम्भावना ब्वलनाच्वंगु दु। तर नेपाली कांग्रेसया सभापति सुशील कोइराला लगायत छुं नेतातय्सं धाःसा आयोग हे गठन यायेमाः धकाः अडान कयाच्वंगु दु। उमिसं आयोग गठन मयायेगु धइगु माओवादीया माग खः धकाः थुइकाच्वंगु खनेदु गुगु गलत खः। आयोग गठनया ज्यायात मधेसवादी लगायत देय्या सकलें जनजातितय्सं नं विरोध यानाच्वंगु दु। उकिं छुं जुयाः कांग्रेसया अडान कथं धकाः आयोग गठन यात धाःसा उकिं झन् मेगु समस्या पिकया बीगु सम्भावना दु। राज्य पुनर्संरचनाया ज्या संविधानसभां यायेधुंकूगु दु। संविधानसभां बिउगु प्रतिवेदन कांग्रेसयात चित्त बुझे मजूगु कारणं उमिसं थ्व कचवं पिकया हःगु खः। तर कांग्रेसी नेतातय्सं थुइकेमाः खँ छु धायेबलय् आयोग गठन समस्याया समाधान लुइकेगु लँपु मखु, समस्यायात झन स्वतुमतु स्वकेगु ज्या जक खः। थुकिं संविधान दयेकेगु ज्यायात झन् जक लिबाका बीगु स्वयां मेगु छुं हे उपलब्धी चूलाकी मखु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
