गुरु लुमंकाः च्वयातःगु पौभाः

शीला साय्मि

न्हापांगु परम्परागत पौभाः प्रदर्शनी ब्योम कुसुमा बुद्ध धर्म संघया ग्वसालय् न्ह्यानाच्वंगु दु। ठमेलया दिवस आर्केड ग्यालरीइ न्ह्यानाच्वंगु उगु ब्वज्याय् न्हूपिं व पुलांपिं झिंगुम्ह कलाकार सहितया अरनिको फाग्पा आर्टिस ग्रुपया किपा दुथ्याः। ब्वज्याय् विशुद्ध पौभाः शैली, परम्परागत व समसामयिक यानाः पीपाः पौभाः ब्वयातःगु दु। थ्व पौभाःत झिंनिदँनिसें पीदँ तकया कलाकारतय्सं च्वयातःगु खः ।

आःतक छगू दर्जन स्वयां पौभाः बिक्री जुइधुंकूगु खँ ब्वज्याया संयोजक दिपक जोशीं कनादिल। न्हापा न्हापा कलाकारतय् ल्हाः, म्हुतु चूलाकेत हे थाकुगु खःसा थौंकन्हय् धाःसा सन्तुष्ट दुगु खँ नं वय्कलं कनादिल। द्यः जुयाः जक मखु परम्परागत शैलीयागु जुयाः नं नेवाः, गैर नेवाः, देशी व विदेशी न्ह्याम्हेस्यां थुज्वःगु पौभाः न्यायेगु यानाच्वंगु खँ नं वय्कलं कनादिल ।

स्वंगू लाख व गुइद्वः मू तयातःगु कलाकार महेन्द्र डंगोलया 'चक्रसंवर' थिकेगु मध्येया छपाः खः धर्म व दर्शनया ज्ञान थुइकेगु व जीवनय् परिवर्त हयेगु सन्देश बियातःगु दु। एक्रेलिक कलरं च्वयातःगु बज्रपाणीया मू धाःसा निगू लख न्हय्न्याद्वः तयातःगु दु। समस्या ज्यंका बीम्ह नापं भय मदयेका बीम्ह द्यः जूगुलिं प्राणी उद्धार यायेत तत्पर जुयाच्वंगु संकेत बियातःगु उकिया कलाकार अमृत डंगोलं कनादी। दिपक जोशीया मैत्रीय बोधिसत्वय् तुषिता भुवनयात केन्द्रित याना तःगु दु। थुकी स्टोन कलर व लँरंग नं छ्यलातःगु दु ।

आकाश योगिनी च्वयादीम्ह नरेश प्रजापतिं मिया ज्वालायात शुद्धताया चिं दयेकादीगु दुसा नग्नतायात खुल्ला रुपया संज्ञा बियादीगु दु। झिंच्यादँ जक दुम्ह वय्कलं थःगु सिर्जनाया श्रय गुरु विजय सर्गःयात बियादी।
मेखे हेबज्रं संसारया दक्व दुःख जवगु ल्हातं ज्वनाः देपागु ल्हातं प्राणी दक्वसिया भिं जुइमा धकाः लँ क्यनाच्वंगु भाव क्यनेत ताःलाःगु दु बालकृष्ण महर्जन। दत्याः न्ह्यः जक थुगु ख्यलय् पलाः तयादीम्ह सुरेन्द्र सिल्पकारं धाःसा एसएलसी जणँच बियाच्वनागु इलय् गुरु विजय सर्गः नापलाःगु अनंनिसें पौभाः च्वयेगु सुरु यानागु खँ कनादी।
विनम्र डंगोलया बज्रयोगिनी, महेश्वर डंगोलया आर्यतारा, मोहन प्रजापतिया भैषज्य तथागत, राजु महर्जनया सरस्वती, शोभा शाक्यया नृत्यनाथ लोकेश्वर, श्रीभक्त प्रजापतिया सब फर द वे, श्यामकृष्ण महर्जनया प्रज्ञा पारमिता, विजय सर्गःया द युनिटि अफ विजडम, अश्वजीत महर्जनया लोकेश्वर, प्रमिला प्रजापतिया षड्क्षरी लगायत ब्वज्याय् ब्वयातःगु किपात उतिकं हे प्रशंसनीय खनेदु ।

प्रदर्शनी न्ह्याये धुंकाः न्हून्हूगु पौभाःत च्वयेगु प्रस्ताव वयाच्वंगु खँय् कलाकारतय्सं लसता प्वंकाच्वंगु दु। पौभाःया अर्थ चित्रया माध्यमं ज्ञां थुइकेगु मनोवैज्ञानिक तथ्य खः धया दिसें थःगु भैषज्य तथागतं कफ, बाफ लगायत पीस्वंगू असन्तुलनं झीगु म्हय् ल्वचं कइगु सन्देश बियाच्वंगु खँ मोहन प्रजापतिं कनादी। "पौभाः च्वये अःपु मजू," संयोजक जोशीं धयादी, 'प्रशिक्षण जक दयां मगाः। लगनशीलता, अध्ययन, नापं साधना नं यायेमाः ।'

पौभालं मनूया जीवनयात परिवर्तन याइगु नापं बांलाःगु व भिंगु सन्देश नं बी फयेकेमाः धइगु वय्कःया धापू खः। ब्वज्यां नं थ्वहे सन्देश बियाच्वंगु दु। वय्कलं तनादी, "पौभाःया निंतिं माःगु दर्शन व प्रतिभा लक्षण विधान मदयेकं मगाः। थुगु ज्ञान गुगुं नं आर्ट काउन्सिलय् स्यनी मखु। थ्व बुद्ध धर्मया गुरुपिंके हे जक स्यना कायेमाः गुगु जिमिसं आचार्य महायोगी श्रीधर राणा रिम्पोछेपाखें सयेका कया ।'

पुचःया नां नं वसपोलं हे तयाबिज्याःगु खः। वसपोल गुरुया हे ख्वीनिदँ बुदिंया लसताय् वसपोलप्रति समर्पित जुयाः थुगु ब्वज्या याःगु खः। ब्वज्यां वःगु ध्यबाया छुं प्रतिशत ग्वसाः खलःयात फ्यायेगु ग्वसाः दु। ज्याझ्वः पावन गुरु श्री छोक्लीङ रिम्पोछें उलेज्या यानादीगु खः ।

More Stories Like this