नेवि संघया विद्यार्थीतय्सं पत्रिकाय् टोडफोड

थःपिनिगु विरुद्ध समाचार च्वल धइगु द्वपनय् वंगु आइतवाः नयाँ पत्रिकाया ज्याकुथिइ बामलाक्क तोडफोड यानाव्यूगु दु । समाचार च्वःगुयाहे कारणं पत्रकारत हिंसाया शिकार जुइमालाच्वंगु वर्तमान इलय् पत्रिकाय् कार्यालयय् तोडफोड याःगु धाःसा दकले लिपांगु घटना खः । नेपाली कांग्रेसया भातृसंगठन नेपाल विद्यार्थी संघ पशुपति इकाइया न्वकु राजन श्रेष्ठ व छ्याञ्जे राजकुमार सिग्देल सहित च्याम्ह विद्यार्थीतय्सं अथ्य पत्रिकाया ज्याकू तोडफोड याःगु खः । कार्यालय दुने च्वंपिं कर्मचारी व पत्रकारतय्त हातसात यासे, म्हुतुपां कम्प्युटर, टेवल मेच व मेमेगु अफिसियल सामानत तोडफोड यानाव्यूगु खः । छु समाचार च्वःगु धयागु खँ आक्रमणकारीतय्सं नं स्पष्ट मयाः व न्यनं नं मधासे सामानत तछ्याना व्यूगु खः । तोडफोड लिपा नायः महाप्रवन्धक भरत पोखरेलयात नं दायेत स्वःगु खः । थुगु ज्या यायेधुंकाः वनेत्यंगु इलय् लेखा शाखाया खापा नं तछ्याना थकूगु धाःगु दु । थुलि जक यानाःनं चित्त वुझय् मजूपिं उपिं च्याम्ह नेवि संघया विद्यार्थीतय्सं ग्राउण्ड फ्लोरया क्वथाया ल्हाय्कं दक्कों तछ्याना थकूगु खः । थ्व वाहेक रिसेप्सनय् च्वंगु फोनसेट व इन्टरकमनं तछ्यानाः थकूगु खः । पशुपति क्याम्पसया स्ववियु सभापति मनोज वैद्यया गाडी वयाच्वंपिं च्याम्ह मध्य निम्हय् सित प्रहरीं घटना जूगुया निघौ लिपा ज्वंगु खः । घटनाय् प्रयोगयाःगु निगः मोटर साइकल बा ३५ प ७०५७ व बा. ३२ प ६९५५ नं उगु क्याम्पसय् सुचुका तःगु अवस्थाय् प्रहरीं थःगु नियन्त्रणय् कायेधुंकूगु दु ।

घटना जूगु लगत्तै नेपाली कांग्रेसया सभापति उगु पत्रिकाया कार्यालय वयाः दुःख प्वंकूसां घटनाय् संलग्न विद्यार्थीतय्त कारवाही यायेगु धाःगु खः । तर कांग्रेसं कारवाही याःसां मयाःसां राज्यं कानून प्रकृया न्ह्याके धुंकूगु प्रहरीया दावा दु । सभापति नापं उपसभापति रामचन्द्र पौडेलंनं दोषीपिन्त कारवाही यायेगु धाःगु खः । पत्रपत्रिकाय् समाचार च्वंःगु कारणं आक्रमण यायेगु पत्रकारतय्त हातपात यायेगु दायेगु आदियात कयाः पत्रकार ख्यलं न्ह्याक्कोहे सः थ्वयेकूसां पत्रिका व पत्रकारत प्रति जुयाच्वंगु हिंसा द्यूगु मदु । एमालेया परशुराम वस्नेतयात सरकारं थौं तक्क नं कानुनया दायराय् हयाः कारवाही न्ह्याके फूगु मदुनि । थुज्वःगु अवस्थाय् कानुन व सरकारहे निरिह व मुक दर्शक जुयाच्वंगु अवस्थाय् पत्रिकाप्रति आक्रमण यायेगु धयागु अन्ततः राज्यया कानुन व्यवस्थाय् भ्याः भचाहे सुधार मवःगुयाहे द्यौतक खः ।
हाल सत्ताया नितिं मधेसवादीतय्गु ग्वाहालिं माओवादीया नेतृत्वय् सरकारला गठन यात, तर मू मू मन्त्रालय् मधेसवादीतय्त वियाः कानुनी राज्यया परिकल्पना यायेगु गलत जुइ । छाय् धाःसा मन्त्री जूपिंहे इमान्दार व नैतिकवान जुइमाः थाय् भ्रष्ट व चरित्रहिन व्यक्तितय्गु ल्हातय् अतिकं सम्वेदनशील मन्त्रालयत वनेवं कानुनी राज्यया थासय् गुण्डा राज्यया व्यवहार जुइगु उलि अस्वभाविक मखु । माओवादीया नेतृत्वय् थुज्वःगुकथंया व्यवहारं अन्तत माओवादीया हे साखय् घाः लाइगु निश्चित खः । मधेसवादीत ला म्हिगः नं वदनाम थौंनं वदनाम । वदमासी वाहेक थुमिसं कमय् यायेफैगु नंला मेगु छुंनं मदु ।

More Stories Like this