मन्त्री हे खुल्ला रुपं बैद्य पक्षया विरोधय् वल
येँ (झीगु स्वनिगः)
एकीकृत माओवादीया नायः पुष्पकमल दाहाल प्रचण्ड व न्वकु डा. बाबुराम भट्टराई पक्षधर मन्त्रीनिसें कार्यकर्तातय्सं माओवादीया हे बरिष्ठ न्वकु मोहन बैद्य किरण पक्षया नेता व कार्यकर्तातय्त कारवाही यायेमाःगु माग यानाः प्रधानमन्त्री नापं पार्टीया न्वकु डा. बाबुराम भट्टराईयात ज्ञापन पौ लःल्हाःगु दु । माओवादीया भोजपुरा राज्य समितिया सचिव नापं वर्तमान माओवादीया नेतृत्वय् दुगु सरकारया भूमिसुधार तथा व्यवस्थामन्त्री प्रभु साहया नेतृत्वय् वंगु पुचलं अथे ज्ञापन पौ लःल्हायेगु ज्या याःगु खः ।
माओवादीया रौतहट जिल्ला इन्चार्ज अशोक जैसवाल थौंकन्हय् माओवादीया बैद्य पक्ष अर्थात ताःचा लःल्हाःगु गलत जुल धैगु पक्षयाम्ह स्थानीय नेता खः । माओवादीया पार्टी दुने लाइन संघर्ष जुयाच्वंगु नाप नापं हतियार तयातःगु कन्टेनरया ताःचा लःल्हाःगु प्रकरण जुयाः पार्टी दुने बहसया विषय जुयाच्वंगु इलय् बैद्य पक्षधरया नेता व कार्यकर्तातय्त कारवाही यायेमाः धकाः गुगु कथं प्रचण्ड व भट्टराई पक्षधर नेता व कार्यकर्तातय्सं ज्ञापन पौ तकं लःल्हायेगु ज्या याःगु दु थुकियात कयाः मनूतय्सं अनाबश्यक कथं कुतः यात धकाः तकं तिप्पणी यानाहःगु दु । पार्टी दुने हे थीथी पक्षयात कयाः बहस जुयाच्वंगु इलय् लाक्क संगठनया विषययात कयाः पार्टीइ सहलह मयासे प्रधानमन्त्रीयात वनाः ज्ञापन पौ लःल्हाःगु खनाः माओवादीया कार्यकर्तात अजू चाःगु दु ।
पार्टी प्रक्रिया कथं स्वयेगु जूसां आःया अवस्थाय् संगठन विभागया प्रमुख बरिष्ठ न्वकु मोहन बैद्य किरण जुयाच्वंगु अवस्थाय् पार्टीया आन्तरिक जूसा नेता बैद्य नाप स्वापू दुगु खँ जूसां प्रधानमन्त्रीयाथाय् वनाः गुगु कथं ज्ञापन पौ बिइगु ज्या म्हिगः याःगु दु थ्व छगू कथं बैद्य पक्षया विरुद्ध खँ बय्बय् यायेगु नितिं वैचारिक बहसयात ध्याकुनय् लाकेत ल्ह्वंगु पलाः जकं मखुला धकाः माओवादीया नेतातय्सं हे धयाहःगु दु । न्ह्याग्गु हे त्वहः तयाः कारवाहीया माग याःगु जूसां ताःचा लःल्हाःगु प्रकरण जुयाच्वंगु इलय् नापं पार्टीया केन्द्रीय समितिइ वइगु १ गतेनिसें सहलह जूवनाच्वंगु अवस्थाय् अथे मन्त्री हे खुल्ला रुपं बैद्य पक्षया विरोधय् क्वहां वःगुयात मनूतय्सं अर्थपूर्ण रुपं कयाहःगु दु ।
