पार्टी तज्याइ मखु : प्रचण्ड

चमत्कारी कथं छप्पँ जुइ : गजुरेल

येँ (झीगु स्वनिगः)

संविधानसभाया दक्ले तःधंगु दल एकीकृत नेकपा -माओवादी)या नायः पुष्पकमल दाहल प्रचण्डं कन्टेनरया ताःचा लःल्हायेगु ज्याया कारणं पार्टी दुने ब्वलंगु विवादं माओवादी पार्टी गुगु नं हालतय् तज्याइ मखु धकाः धयादीगु दु । नेपाली कांग्रेसया भ्रातृ संगठन नेपाल विद्यार्थी संघया कार्यकर्तातय्सं नयाँ पत्रिका न्हिपौया ज्याकुथिइ याःगु आक्रमण लिपा निरक्षण यायेगु झ्वलय् संचारकर्मीतलिसे खँल्हासें प्रचण्डं अथे धयादीगु खः । माओवादी दुने लाईन संघर्ष जुयाच्वंगुलिं आः पार्टी तज्याइगु जुल धकाः थीथी मनूतय्सं टिप्पणी यानाः हयाच्वंगु इलय् वय्कलं धयादिल 'पार्टी जुइवं सहलह व बहस जुइ । जिमिसं केन्द्रीय कमिटीया मुँज्या सःते धुनागु दु । विवाद केन्द्रीय कमिटीं हे हल याइ । पार्टी गुगु नं हालतय् तज्याइमखु ।'

अथे हे म्हिगः सिन्धुलीया सदरमुकाम सिन्धुलीमाढी लागाय् न्हय्क्वःगु विशाल—कुमार स्मृति सभाय् झ्वलय् नायः प्रचण्डं दुई लाइन संघर्षं पार्टी झन एकता जुइ धकाः दाबी यानादिल । वय्कलं धयादिल 'बिचारया छलफलं तज्याइ मखु बरु संघर्षया झ्वलय् तीब्र जुइ । व धैगु न्हूगु एकता कायम यायेगु जिमिगु पार्टीया विशेषता खः ।' आःया सवालया ई धैगु ऐतिहासिक अवसर व चुनौतिपूर्ण जू धयादिसें वय्कलं आरोप प्रत्यारोप त्वःताः शान्ति व संविधान निर्माणय् केन्द्रीत जुइत दलतय्त आह्वान नं यानादिल । माओवादीया नायः प्रचण्डं धयादिल 'शान्ति व संविधान निर्माणय् माओवादी व जनआन्दोलनया सहयात्री दलत नापं डुंगाय् यात्रा यानाच्वनागु दु । व डुंगा फातापुल धाःसा माओवादी जक मखु कांग्रेस व एमाले नापं मेमेगु दलत नं सिधइ ।'

वय्कलं स्वला तक सुनां नं सुयात न्ह्यःनेलाःथे मधासे लचकता क्यनाः न्ह्याः वनेमाःगु अवस्था दु धयादिसें शान्ति व संविधानया नितिं सकलें छप्पँ छधी जुयाः वनेमाः धकाः नं धयादिल । नायः प्रचण्डं स्वलाया दुने शान्ति प्रक्रियाया आधारभूत ज्यापूवंकेगु जुइ धकाः नं धयादिल । अथे हे एकीकृत माओवादीया न्वकु नापं प्रधानमन्त्री डा. बाबुराम भट्टराई नं जनतां थ्व इलय् आशा याःगु अले व हे आशा कथं थःम्हं छुं यानाः क्यनेगु कुतः यानाच्वनागु दु धकाः नं धयादिल । आःया अवस्थाय् सरकार खिउगु थासय् पुलुपुलुगेरा थें जुयाच्वंगु नापं जनतां आशा यानाच्वंगुलिं थःम्हं राहतया ज्याझ्वः हयेगु जुइ धकाः नं धयादिल ।
वय्कलं शान्ति प्रक्रिया, संविधान निर्माण, सुशासन, जनतायात राहत बिइगु व आर्थिक बृद्धिदर अप्वयेकेगु हे आःया सरकारया प्राथमिकताया खँ खः धकाः धयादिल । उगु ज्याझ्वलय् माओवादीया बरिष्ठ न्वकु मोहन बैद्य किरण पक्षधर कथं नालातःम्ह माओवादीया छ्याञ्जे सीपि गजुरेलं पार्टी छप्पँ छधी जुयाः चमत्कारी कथं न्ह्याः वनी धकाः धयादीगु दु ।

वय्कलं धयादिल 'माओवादी पार्टी दुने दुई लाईन संघर्ष जुयाच्वंगु दु । थ्व न्ह्यानाः हे च्वनी । गथे पार्टी दुने अन्तरसंघर्ष यानाः च्वनागु दु अथे हे पार्टीयात जोगेयायेगु ज्या नं यायेसः । सुनां नं पार्टी तज्याइ धकाः धाल धाःसा व पत्याः यायेमजिउ । ' शान्ति प्रक्रिया न्ह्याः वनेवं क्रान्ति पूरा जूगु जुइमखु धयादिसें नेता गजुरेलं क्रान्ति दथुइ थ्यंगु क्रान्तियात त्वःताः गनं नं वने फैमखु धकाः नं धयादिल ।