'बैद्य पक्षयात पेले यायेगु डिजाइन'

येँ (सन्ध्या टाइम्स)/एकीकृत माओवादी अध्यक्ष प्रचण्डं आःया अवस्थाय् पार्टीया बरिष्ठ उपाध्यक्ष मोहन बैद्य किरण पक्षयात क्वत्यलाः हे वनेगु रणनीति दयेकूगु दु।
माओवादीया छम्ह नेतां थौं 'सन्ध्या टाइम्स' लिसे खँ ल्हासें संस्थापन पक्षं बैद्य पक्षयात क्वत्यला हे छ्वयेगु तयारी याःगु दु धकाः कनादीगु दु। भारतया संस्थापन पक्षनाप जानाः अथे माओवादीया संस्थापन पक्ष वनेत्यंगु खः धकाः धाःगु दु। भारतया प्रतिनिधितलिसे गोप्य कथं सहमति जूगु कथं कन्टेनरया ताःचा लःल्हायेगु ज्या याःगु खः धकाः बैद्य पक्षं आरोप बियाच्वंगु दु। अथे हे नेपालय् गुलि नं परियोजना भारतं संचालन यानाच्वंगु दु व फुक्क परियोजनाय् सेना परिचालन यायेगु निसें आःयागु डा. बाबुराम भट्टराईया सरकारयात हे स्वलाया दुने राष्ट्रिय सहमतिया सरकार दयेकेगु नितिं नेपाली कांग्रेस व एमालेयात नं दुथ्याकेगु नं सहमति याःगु खँ सूत्रं धाःगु दु। थ्व हे झ्वलय् एमाले व कांग्रेसलिसे स्वापू बांलाकायंकेगु नितिं नं संस्थापन पक्षं भूमिका म्हिताच्वंगु दुसा माओवादीया केन्द्रीय समितिया बैठक असोज १ गते च्वने न्ह्यः माःगु कथं आन्तरिक तयारी यायेगु ज्या नं संस्थापन पक्षं याइ धाःगु दु ।

बैद्ययात माइनस यायेत प्रचण्ड व भट्टराई सिन्धुलिइ
पार्टीया कार्यकर्तात निगू पक्षय् विभाजित जुयाः सिन्धुलीइ यायेत्यंगु ज्याझ्वःयात छगू जक यायेत एकीकृत माओवादीया अध्यक्ष प्रचण्ड व प्रधानमन्त्री नापं पार्टीया उपाध्यक्ष डा. बाबुराम भट्टराई उखेपाखे वनीगु जूगु दु। विशाल-कुमार स्मृतिसभा प्रचण्ड पक्षं छगू थासय् अले उपाध्यक्ष मोहन बैद्य व भट्टराई पक्षपाखें छगू यानाः ब्यागलं ब्यागलं ज्याझ्वः यायेत्यंगु खःसा अथे ज्याझ्वः याके मबीत थौं प्रचण्ड व भट्टराई सिन्धुलिइ वनेत्यंगु खः। थुकथं निम्हं हे नेतात वनीगु जुइवं थौं निगू हे ज्याझ्वःयात छगू ज्याझ्वः याःगु दु ।

छं छु यायेफु या: प्रचण्ड
कन्टेनरया ताःचा लःल्हायेगु ज्या याःगु विषययात कयाः असन्तुष्ट जुयाः एकीकृत माओवादीया बरिष्ठ उपाध्यक्ष मोहन बैद्य किरणं पार्टीया अध्यक्ष प्रचण्डयात फोन याःबलय् प्रचण्डं 'यायेमाःगु ज्या याये धुन आः छं छु यायेफु या' धकाः लिसः बियाहल धकाः सूत्रं धाःगु दु ।

प्रचण्डया उगु लिसः न्यने धुंकाः बैद्यं नं थःगु हे कथं तयारी यायेगु झ्वलय् कार्यकर्तातय्त प्रशिक्षण बीगु ज्यायात तीव्र रुपं न्ह्याकूगु दु। थ्व हे झ्वलय् थौं बैद्य पक्षं यल जिल्लाया थःगु पक्षयापिं कार्यकर्तातय्त प्रशिक्षण यायेगु ज्याझ्वः तयातःगु दु। अथे हे म्हिगः येँ जिल्लाय् प्रशिक्षण ज्याझ्वः तःगु खःसा उगु हे इलय् लाकाः प्रचण्डं नं थःगु पक्षयापिं कार्यकर्तातय्त प्रशिक्षण बीगु ज्याझ्वः तःगु खः ।