बन्द अवज्ञा यात धकाः जिल्ला शिक्षा अधिकारीयात आक्रमण
अधिकारीया गाडी तोडफोड, एमाले अखिलपाखें दाङ, बाँके व बर्दिया बन्द आह्वान
येँ (सन्ध्या टाइम्स)/एमाले अखिलया कार्यकर्तातय्सं थौं सुथय् बन्दया अबज्ञा यात धकाः बाँके जिल्ला शिक्षा अधिकारी भक्त ढकाल च्वनावंगु सरकारी गाडी तोडफोड यानाः ढकालयात भौतिक आक्रमण तकं याःगु दु ।
नेपालगञ्जं सुर्खेतपाखे ढकाल च्वनाः वनाच्वंगु सवारी साधन बा १ झ ६२२२ नम्बरया सरकारी गाडी एमालेया कार्यकर्तातय्सं बाँकेया बनेखेत धइगु थासय् तोडफोड यानाबिउगु खः धकाः प्रहरीं धाःगु दु। इमिसं ढकालयात ल्हाः वानाः सामान्य धाःपाः तकं यानाबिउगु दु। गाडी धाःसा पूर्ण रुपं हे क्षति जूगु दु ।
एमाले अखिलं थौं दाङ, बाँके व बर्दिया जिल्ला बन्द आह्वान याःगुलिं सुथंनिसें हे अनया जनजीवन प्रभावित जुयाच्वंगु दु। थःपिनि कार्यकर्ता विष्णु विक्रम शाहीयात म्हमसिउपिं मनूतय्सं आक्रमण यानाः स्यानाबिउगु विरोधय् अखिलं थ्व बन्द आह्वान याःगु खः। बन्द आह्वान यानातःगुलिं अनया पसः, यातायात, बजाः, शिक्षण संस्था छुं हे चालाच्वंगु मदु ।
सुथंनिसें हे बन्द आह्वानकर्तातय्सं सतकय् च्वनाः प्रदर्शन यानाच्वंगु दु। आक्रमणकारीतय्त ज्वनाः कारवाही यायेमाःगु नापं सीम्ह कार्यकर्ता शाहीयात सहिद घोषणा यायेमाःगु नं माग इमिसं याःगु दु ।
वंगु भदौ १२ गते चान्हय् कारकाँदो धाःथासय् म्हमसिउपिं मनूतय्सं छुरां सुयाः शाहीयात स्यानाबिउगु खः। उगु घटनाय् लानाः घाःपाः जूपिं अखिलया कार्यकर्तात निकेश लामिछाने व विक्रम गुरुङयात येँय् हयाः वासः याकातःगु दु ।
