चलखं ल्हानाः प्यम्ह मस्त नापं खुम्ह बेपत्ता
येँ (सन्ध्या टाइम्स)/वंगु चान्हय् रुकुमय् चलखं ल्हानाः प्यम्ह मस्त नापं खुम्ह मनू बेपत्ता जूगु दु। रुकुमया पूर्वी लागाया हुकाम गाविस वडा नं. ७ या काचरजंग धइगु खुसि दुथाय् अथे चलखं खुम्हेसित ल्हाःगु खः। चलखं ल्हानाः बेपत्ता जूपिं हुकाम गाविस वडा नं ७ या ५२ दँ दुम्ह जनककुमारी बुढा, १९ दँ दुम्ह सुनीता घर्ती, सुनिताया दछि दुम्ह काये हिमाङसु घर्ती, १० दँ दुम्ह सरीता बुढा व ८ दँ दुम्ह पुजीनी बुढा खः धकाः जिल्ला प्रहरी कार्यालय रुकुमया प्रहरी निरीक्षक किशोर श्रेष्ठं धयादीगु दु ।
हुकाम गाविसया काचरजंग खुसि सिथय् दुगु लःघलय् कःनि क्यलेत वंगु इलय् च्वं चलः वयाः ल्हानाः लःघः नापं ल्हाकाबिउगु खः। घटनास्थलय् इलाका प्रहरी कार्यालय रन्मापाखें चान्हय् हे प्रहरीया पुचः घटना जूगु थासय् थ्यने धुंकूगु दु धकाः नं प्रहरी निरीक्षक श्रेष्ठं धयादीगु खः।
इलाका प्रहरी कार्यालय रन्मा घटनास्थल थ्यंमथ्यं ६ घण्टा न्यासि वनेमाःसा जिल्लाया सदरमुकाम खलंगां धाःसा स्वन्हु न्यासिवनेमाः ।
