यँयाः व्यवस्थित यायेत प्रहरीया तयारी

येँ (सन्ध्या टाइम्स)/न्ह्यःने वयाच्वंगु यँयाः जात्रायात कयाः जनसेवा प्रहरीया ग्वसालय् म्हिगः छगू सहलह मुँज्या जुल। चय्गू थीथी संस्था लगायत १०३ म्ह मनूतय्सं ब्वति काःगु उगु ज्याझ्वः मखंया तलेजु पार्टी प्यालेसय् जूगु खः। जनसेवा प्रहरीया इन्चार्ज कवित कटुवालं जात्रा स्वयाः न्ह्यः हे सम्बन्धित संस्थात नाप सहलह याना वनेगु आवश्यक जूगुलिं जात्राया उद्देश्य सकसिगुं छगू हे जूगु कारणं थुकथंया ज्या यानागु खँ कनादिल। वय्कलं जात्राया निंतिं १९ पेज ताःहाकःगु सेक्युरिटी प्लान तयार यासें पेश यानागु, रथय् म्वाःमदुपिं मनूत मतयेगु, अय्लाः त्वनावःपिंत विशेष ध्यान बीमाःगु ल्वापु, पाकेटमार, सवारी अवरोध, म्वाः मदुगु हल्ला जुइगु, जातीय व धर्मया खँ न्ह्यथनाः अनावश्यक हुलदंगा याइगु थेंज्याःगु खँ हे मू जूगुलिं थुज्वःगु खँयात विशेष नियन्त्रण यायेगु तयारी जुयाच्वंगु खँ कनादिल ।

अथे हे ट्राफिक प्रहरीपाखें रथया न्ह्यःने हे ट्राफिक प्रहरी च्वनाः सुरक्षा बीगु नापं थाय्थासय् गाडी मवइगु कथं ट्राफिक व्यवस्था यायेगु जानकारी नं बियादिल।
जात्राबलय् प्रहरी नापं स्थानीय जनता व क्लबत नं परिचालन जुइगु कारणं २२ गते बसन्तपुली हाकनं छक्वः स्वयंसेवक पास वितरण नापं तालिम नं बीगु योजना खँ कनादिल ।

थ्वहे झ्वलय् कन्हय् बुधवाः यँयाः जात्रायात हे कयाः क्षेत्रपाटी पार्टी प्यालेसय् स्वयंसेवकपिनिगु छगू सहलह मुँज्या नं याइगु जानकारी बिउगु दु। जात्राय् विशेष यानाः १०० म्ह स्वयंसेवक परिचालन याइगु खँ वय्कलं कनादिल ।

ज्याझ्वलय् खड्गी सेवा समितिया मनोज नेवाः, नेपालभाषा मंकाः खलःया नरेशवीर शाक्य, नेवाः जागरण मञ्चया सुजिव बज्राचार्य, हनुमान ढोका दरबार संरक्षण क्षेत्रया हरि श्रेष्ठ, भोताहिति बजार व्यवस्थापन समितिया ज्ञानेन्द्र तुलाधर, प्रबोध कसाः, चन्द्र महर्जन, जनसेवा सामुदायिक केन्द्रया अध्यक्ष विद्यासुन्दर शाक्यपिंसं नं यँयाः जात्रायात व्यवस्थित, सुरक्षित व सभ्य ढंगं हनेगु बारे थःथःपिनि बिचाः प्वंकादीगु खः ।