भट्टराई सरकारं क्यंगु भिंगु लक्षण

कृष्ण प्रजापति

सरकार गठन जूगु छवाः लिपा हे डा. बाबुराम भट्टराईया नेतृत्वय् सुरु जूगु माओवादीया मिलिजुली सरकारं थीथी भिंगु लक्षणत क्यना हःगु दु। खास यानाः प्रधानमन्त्री जुइवं हे स्वदेशी उत्पादन छ्यलेत यानादीगु आह्वान नापं थम्हं नं विदेशं वइगु थिकेगु गाडी त्वःताः देशय् हे उत्पादन जूगु 'मुस्ताङ' गाडी गयेगु सुरु यायेवं छगू ल्याखं माओवादी नेतातय् दथुइ खैलाबैला जूवंगु दु। न्हापा न्हापा नं मन्त्री प्रधानमन्त्री जुइपिंसं थथे हे फजुल खर्च बचे यायेगु चरित्र क्यनेमाःगु खः। तर थः प्रधानमन्त्री जुइवं हे लाखौं वंगु घडी, लाखौं वंगु पलङ छ्यलाः सर्वहारा चरित्रया अःखः वनेवं तत्कालीन प्रम प्रचण्ड आलोचित नं जूगु खः। तर आः उपाध्यक्ष डा. भट्टराईनं थम्हं हे न्हापां प्राडो पाजेरो त्याग यानाः दंगु 'मुस्ताङ' गाडी गयेवं म्हिगःया मन्त्री प्रधानमन्त्रीतय्सं कयातःगु सुविधाया गाडी लित बीगु लाकि प्रयोग याना हे च्वनेगु धइगु न्ह्यसः पिहां वःगु दु।
खय्त ला प्यंगू न्यागू लाखं लाःगु 'मुस्ताङ' गाडी प्रधानमन्त्रीं गयेवं माग नं अप्वया वंगु दु। नापं अप्रत्यक्ष रुपं थ्व गाडीया विज्ञापन नं जूवंगु दु। खय्त ला प्रधानमन्त्री भट्टराई न्हापा अर्थ मन्त्री जूबलय् नं सभासद्तय्त विदेशी ध्यबा पुलाः हयेमाःगु चिकं तयाः चले जुइगु गाडीया पलेसा ब्याट्रीं चले जुइगु साइकल छगू छगू बीगु धाःगु नं खः। तर उकियात सुं हे सभासद्तय्सं माने मयाः। आः प्रधानमन्त्री स्वयमं प्यंगू न्यागू लाख वंगु गाडी गइबलय् वयां क्वय्या मन्त्री व सभासद्त करोडौं वंगु पाजेरो व प्राडो गयाः ज्याझ्वलय् वयेत नं नैतिक न्ह्यसः ब्वलनावःगु दु। उकिं म्हुतुं छु धाइ व मुख्य मखु, व्यवहारं छु क्यनी व मुख्य जुइ। तःधंगु ओहोदाय् वनीपिं मनूतय्सं याःगु बांलाःगु ज्यायात मेपिंसं नं अनुकरण याइ। डा. भट्टराई थौं राष्ट्रया हे प्रमुख पदय् थ्यने धुंकूगु दु। आः वय्कलं यानादीगु बांलाःगु गतिविधि व बांलाःगु व्यवहारयात मेपिंसं अनुकरण मयासें मगाः। अथे जुयाः नं बांलाःगु संकेत कथं म्हो ध्यबां प्राप्त जुइगु गाडी गयाः जक सिंहदरवार वनेगु डा. भट्टराईया सोच छगू कथं चीधंगु खनेदुसां देशया आर्थिक लाभया लागिं धाःसा तसकं हे महत्वं जाःगु निर्णय खः। स्वलाया दुने संविधान तयार यानाः न्ह्यब्वयेत थ्व सरकार निर्माण जूगु खः। गथे २०४७ सालय् कृष्णप्रसाद भट्टराई सरकारं दछिया दुने न्हूगु संविधान जारी यानाः छगू ल्याखं नमूना ज्या न्ह्यब्वयाक्यंगु खः। आः भट्टराई सरकारं नं स्वलाया दुने हे बांलाःगु भिंगु व जनतायात उपयोगी जुइगु कथंया उचित संविधान जारी यानाः क्यनी धइगु आशा नेपाली जनतां कयाच्वंगु दु। थ्व आशा पूवनी धइगु संकेत वय्कःया ज्यां क्यनाच्वंगु दु ।

प्रधानमन्त्री जूगुलिं वय्कःयात थीथी सरकारी निकायं पत्रपत्रिकाय् बधाई विज्ञापन छापे यानाः सरकारया धुकू फुकूगु खँय् नं वय्कलं अथे याये मते धकाः मुख्य सचिवयात निर्देशन बियादीगु खः। न्हिनया संकेत सुथया निभाः स्वयाः सीदइ। आवंलि छक्वः मन्त्री प्रधानमन्त्री जुल कि गाडी सुविधा कायेगु, सुरक्षा सुविधा कायेगु व प्रयोग यानाच्वंगु छुं नं चीज मत्वःतेगु थेंज्याःगु प्रबृत्ति समाप्त यायेगु न्हापांगु कुतः नं थ्वहे जुइफु। २०५२ सालपाखे शेरबहादुर देउवा प्रधानमन्त्री जूगु इलय् सकलें सांसदतय्त गाडी सुविधा बीगु निर्णय याःबलय् सदनय् प्यम्ह जक सांसद दुगु नेपाल मजदुर किसान पार्टीं उकिया विरोध यानाः उगु सुविधा बहिष्कार याःगु खः। शेरबहादुर देउवां शाही सरकारया प्रधानमन्त्री जूगु इलय् २०६० सालपाखे हाकनं छक्वः पीगू लाख वंगु प्राडो राज्यपाखें उपलब्ध यायेगु कथं सदनय् निर्णय जूगु खः। राजश्व पुले म्वायेक व्यक्तियात वा विदेशी मारवाडीयात पोसे याकेगु कथंया उगु निर्णयया तीब्र विरोध लिपा उकियात खारेज याये मालावन। दलतय्सं सुविधाया विरोध व बहिष्कार यायेवं कानुनी भ्रष्टाचार व अनैतिक रुपं याःगु उगु निर्णय लित कायेत सरकार बाध्य जुल। आः धाःसा सरकार स्वयमं अज्याःगु हे मितव्ययिता क्यनाः छगू कथंया शुभ संकेत न्ह्यब्वःगु दु ।

नेपालय् हे दयेकूगु दंगु मोटर गयेगु सुरु जुइवं न्हापा न्हापा गाडी यंकातःपिं पुलांपिं प्रधानमन्त्री, उपप्रधानमन्त्री, गृहमन्त्री, मन्त्री लगायत उच्चपदस्त कर्मचारीतय्सं यंकातःगु सुविधाया गाडी बारे नं न्ह्यसः ब्वलंगु दु। आः नैतिक रुपं हे उमिगु गाडी लित बीमाःगु, सुविधा हे कायेगु खःसा दंगु व स्वदेशय् दयेकूगु गाडी जक प्रयोग जुइमाःगु खँय् नैतिक दवाव लाःवंगु दु। सरकारी ओहदाय् च्वनीपिं सुं नं मन्त्री प्रधानमन्त्रीतय्सं थथे नेपालय् दयेकूगु दंगु गाडी गयेमाः धकाः नियम हे दयेकेमाःगु सः नं थ्वया वःगु दु। अज्याःगु नियम सदनं हे पास यानातःसा उकिं लिपा लिपा तकं लँ क्यनाच्वनी। नेमकिपा लगायतया राजनीतिक दलतय्सं निरन्तर पाजेरो सुविधाया विरोध मयाःगु खःसा शेरबहादुर देउवाया सरकारं निक्वः निक्वः तक यानाक्यंगु आपराधिक ज्या अथें हे पचे याना छ्वइगु खइ। तर नये धुंकूगु सुविधा नं लिपा राज्ययात ल्ह्वया बीमाल। अबलय् निसें हे नैतिक रुपं पतन जूपिं प्रधानमन्त्री मन्त्रीतय्सं थ्व इलय् वयाः जूसां भिंगु संकेत क्यंगु दु। मन्त्रीतय् सम्पत्ति विवरण स्वयेगु खःसा सुयाकें हे करोड वंगु गाडी गयेगु हैसियत मदु। स्वयम प्रचण्डंनिसें थीथी मेपिं पूँजीपति नेतातय्सं न्ह्यब्वःगु सम्पत्ति विवरणय् उपिं अज्याःगु गाडी गयेगु हैसियत दुपिं खः धकाः क्यना तःगु मदु। अथे जुयाः नं हैसियतं पिने लाःगु गाडी सुविधा कायेगु राष्ट्रया लागिं घाटा खः ।

उच्च पदय् च्वने धुनेवं हे बिलासी गाडी तयेगु, छम्ह हे मन्त्रीं स्वंगः प्यंगः तक गाडी सुविधा कायेगु नापं म्वाः मदुगु कथं राष्ट्रया धुकू फुकेगु ज्या न्ह्याकाच्वंगु दु। अज्याःगु थीथी अन्यौलया दथुइ सत्ताय् हे थ्यनेधुंकाः नं सुविधाया गाडी कटौती यानाः डा. बाबुराम भट्टराईं सुविधाभोगीतय्त लात नका बिउगु दु। उकिं सितिकं नये दुसा चुपं गुमाना त्वने फुपिं झी राजनेतातय्गु स्वभावय् छुं परिवर्तन वइगु आशा कायेछिं। थौंकन्हय् झीथाय् गाडी मदुपिं नेतात लुइके थाकु। तर जनतायात सुविधा बीगुपाखे धाःसा थ्व नेतातय् ध्यान वंगु खने मदु। सभासद् व राजनेता थेंज्याःपिं उच्चपदस्थ व्यक्तित मोटरगाडीइ गया जुल धकाः सुयां प्वाः स्यायेमाःगु खने मदु। तर उकथंया सुविधा नेपाली जनतायात नं बीगुपाखे उमिगु ध्यान वनेमाः। अझ म्हिगः गाडी यंकाः चले यानाच्वंपिं पुलांपिं मन्त्री प्रधानमन्त्रीतय्गु विलासी रुपं चले यानाच्वंगु गाडी लित काये फत, आःया मन्त्रीतय्सं दंगु व भिंगु प्रधानमन्त्रीया थेंज्याःगु स्वदेशय् उत्पादित गाडी हे गयेके फत व अबैध गाडीयात नियमित यायेगु ज्यायात नं निरन्तरता बियाः भ्रष्टाचारी, कालाबजारी व तस्करीतय् विरुद्ध वर्तमान सरकारं ज्या याना वने फत धाःसा थुगु स्वलाया सरकारं नं चन्द्र शमशेरया स्वीदँया शासन स्वयां चमत्कार क्यनाबीगु भिंगु लक्षण खनेदु ।

More Stories Like this