आन्दोलनया झ्वलय् जुइगु 'अपराध'

माओवादी सरकार व मधेसी मोर्चा दथुइ जूगु सम्झौताया छगू बुँदाय् आन्दोलनया झ्वलय् थीथी द्वपनय् लानाः मुद्दा लानाच्वंपिं मनूतय्त आम माफी बीगु धकाः उल्लेख यानातःगु खँयात कयाः विवाद पिहां वःगु दु। थीथी द्वपनय् मुद्दा लानाच्वंपिंत माफी बी मजिउ धकाः देय्या मानव अधिकारवादीतय्सं दवाव बिउगु दुसा आः नकतिनि राष्ट्रिय मानव अधिकार आयोगपाखें तकं सरकारयात पौ च्वयाः अज्याःगु मुद्दा लित मकायेत निर्देशन बिउगु दु। थुकिं यानाः निगू बिस्कं कथंया आन्दोलन यानाः सत्ताय् वःपिं माओवादी व मधेसी मोर्चायात थाकुगु अवस्थाय् लाका बिउगु दु ।

खतुं सुयां हत्या याःगु, सम्पत्ति लुटे याःगु वा मेगु छुं कथंया अपराध याःगु द्वपं बियाः मुद्दा हे न्ह्याकातःपिं मनूतय्त क्षमा बीगु पाय्छि मजू। तर थ्व सन्दर्भय् निता खँ धाःसा थन मनन यायेमाःगु आवश्यकता दु। छता, अधिकारया लागिं आन्दोलनय् लगे जूपिं मनूतय्त बियातःगु अज्याःगु द्वपं धाथें सत्य खः लाकि मखु? मेता, आन्दोलनया झ्वलय् बांलाःगु नियतं याःगु उकथंया ज्यायात अपराध धायेगु पाय्छि खः लाकि मखु? देशय् बहुदलीय व्यवस्था वये न्ह्यः तत्कालिन प्रजातन्त्रवादी नेतातय्त नं पञ्चायती सरकारं थीथी कथंया द्वपं बियाः मुद्दा चले याना तःगु हे खः। लिपा विमान अपहरण यानाः बैंकया ध्यबा लुटे याःपिं मनूतय्गु मुद्दा तकं सरकारं लित काःगु हे खः। आन्दोलनया दौरानय् जूगु घटनायात थ्व दृष्टिकोणं नं स्वयेमाः। आन्दोलनया आवरणय् गम्भीर अपराध याःपिं, आन्दोलनया भावना अःखः ज्या याःपिनि हकय् धाःसा मेगु हे खँ जुइ। थ्व अवश्य नं विचारणीय पक्ष खः ।

More Stories Like this