कायाः अष्टमि

लव कर्माचार्य

दछिया छक्वः वइगु थीथी पर्वमध्ये कायाः अष्टमी नं छगू खः। चथाः वंगु न्यान्हु व ऋषि पञ्चमिया प्यन्हु लिपा थ्व कायाः अष्टमि न्यायेगु याइ। पात्रोय् शुक्ल पक्षपाखे अप्वः अष्टमिया नां दुथ्याकातःगु दु। उकी भाद्र शुक्ल यंलाथ्व अष्टमिनिसें चैत्र शुक्ल चउलाथ्व अष्टमितक दुथ्यानाच्वंगु अष्टमिया नां धलः थुकथं दुथ्याकातःगु दु:-

१) भाद्र शुक्ल यंलाथ्व कायाष्टमि, २) आश्विन शुक्ल कछलाथ्व महाअष्टमि, ३) कार्तिक शुक्ल कछलाथ्व गोपाष्टमि, ४) मार्ग शुक्ल थिंलाथ्व बखुंमद अष्टमि, ५) पौष शुक्ल प्वहेलाथ्व जन्मोष्टमि, ६) माघ शुक्ल सिल्लाथ्व भिष्णाअष्टमि, ७) फाल्गुण शुक्ल चिल्लाथ्व चिराष्टमि व ८) चैत्र शुक्ल चउलाथ्व चंत्राष्टमि खः।
थुगु अष्टमिया लछि लिपा नवरात्रिया महाअष्टमि व खुला लिपा चीर स्वाइगु अष्टमि लानाच्वनी। थ्व अष्टमि तिथि धयागु चन्द्रमास कथं हरेक लाया वाय् प्रत्येक महिनाया कृष्णपक्ष व शुक्लपक्षया च्यान्हुगु वाय् मध्यगु तिथिइ लानाच्वनी। अले थुपिं अष्टमि धयागु शुक्लपक्ष तिमिलाया न्हिनसिया १२ ताः इलय् लुयाः सन्ध्या ६ ताः इलय् आकाशय् थ्यनाः चान्हय् १२ ताः इलय् हे लुकुं बी ।

अथे हे कृष्णपक्ष खिमिलाया चान्हसिया १२ ताः इलय् लुयाः सुथसिया ६ ताः इलय् आकाशय् थ्यनाः न्हिनसिया १२ ताः इलय् लुकुंबी। थुबलय् चन्द्र व सूर्य च्वःच्वः जुयाः पृथ्वी कुं लुयाः कोणधारी जुयाः वायु मण्डल उठे जुइ। अष्टमिया चन्द्र कला धयागु शुक्लपक्ष तिमिला दुतियांनिसें पुन्हितक चाकलाःगु घेरां लुयाः अर्ध चन्द्रय् वयाः लुइ-बी जुयाच्वनी। अले अथे हे कृष्णपक्षया खिमिला नं चाकलाःगु घेरां क्वपालाः पाः जुजुं वनाः आमाइतकया दुने खने मदयावनी। जः नं पाः जुजुं वनी। थुबलय्या अष्टमि नं अर्ध चन्द्र हे जुयाः बछि लुइ-बी जुयाच्वनी। अथे हे थ्व चन्द्रमास अष्टमि शुद्ध तिथि सूर्यमासया छवाः वंगु ८ गतेया छुमा कथं जुयाच्वनी ।

आः थ्व कायाः अष्टमि पर्व धयागु नं काभ्रे व सिन्धुपाल्चोकया दथुइ लाःगु नालाया सल्लाघारीं ध्यनाहःगु न्हूगु यःसिं साला हयाः ख्वपय् दिके हइ। वयां कन्हय् वा कंस कुन्हु ख्वपं थिमि दिके हइगु जुइ। वयां लिपा थिमिं येँया भोताहिति, समरजंग अ�ा लिक्क, दरबार हाइस्कूल लिउने दिके हइगु जुयाच्वनी। वहे यःसिं थ्व कायाः अष्टमि कुन्हु भोताहितिं येँया लाय्कुली दिके हइ गुगु यःसिं कुश्ले पञ्च वाद्य व शार्दुलजङ्ग पल्टन जुजुया प्रतिक खड्ग, छालिका थे न्ह्यः न्ह्यः लाकाः गुगु यःसिं लिउ लिउ लाकाः मालश्री धुन हायेकाः साला हयाच्वनी ।

आः थ्व कायाः अष्टमि पर्व कुन्हु कागेश्वर मेला नं न्ह्याइ। स्वनिगःया पूर्व उत्तरपाखे (सक्वं थुखे जलं उखे) कागेश्वर गुं कुहां वःगु लः धाः कवःया म्हुतुं पिहां वयाः महाद्यःया छ्यनय् जुनाः वहे लः धाः महाद्यः खुसि अर्थात् महाद्यः खुसिया नामं मनहरा खुसिया ग्वाहालिं न्ह्यानाच्वंगु खः। अन सतिक येँया लाय्कूया कागेश्वर महाद्यःया मेला न्हिछि हे न्ह्यानाच्वनी। च्वय् धया थें यःसिं कागेश्वर बहाः व इन्द्र देगः दथुइ क्वसं दिके हइ ।

More Stories Like this