जितः स्यायेतः कुतःयाम्हसितः स्वांमाः क्वखायेकुगु इलय्...

सुधीर ख्वबि
जिगु विश्वासया नुगः त्याका
जिगु जन्हुफातय् चुपीं सुल, छं
जिगु उजुरीइ मस्यु छु मगाःमचाः जुल
साक्षी किनारय् सुयांगु नां मदुगु न खः
उकीं , ए जिगु सम्वेदनया ज्यानमारा !
छं उन्मुक्ति काःगु थ्व इलय्
छंतः लसकुस यायेतः ह्वलाःहःगु स्वांतयेसं
जिगु आत्माय् कँ जुया
सामुहिक बलात्कार याःगु थें जुल ।

जिगु कौमार्यय् याकःति शासन याःम्ह छ
थुगु थ्व इलय् ,
जिगु गर्भस्थ चुलिह्वयावःगु बुँ खना ग्याःम्ह , छ
जिं फ्वनागु छतिकी भुयू सिन्हःया थासय्
छं वांन्छ्वयाहःगु लाक्वपाक्व वचनं
त्यात्या जूगु थ्व नुगःचु प्वःच्युच्युं
छंगू विरुद्ध दायर रितया बर्खास्ती नापं
जिं बिइमफुगु व मतिना कालबिलया सबूत प्रमाणत
लज्या व चरित्रहीनताया नजीर दयेका ब्यूगु दु ।

छ नीलः साबित जूगु बापतय्
छंतः क्वखायेकुगु स्वांमाःया भारीं
जिगु गर्भस्थ चुलिह्वयावःगु बुँया गःपः तियाःब्यूगु थें जुल ।

ए, मतिनाया ज्यानमारा !
छंगु म्हय् स्वां गायाच्वंगु इलय्
जिं खना,
मिखाय् हाकु कापः चिनाः न्हिलाःच्वंपिं
हाकुगु कोत ब्वयाच्वंपिं , छंगु ख्वाःपाःया प्रवित्तित
बँय् वान्छ्वया न्हुत्तु न्हुयाच्वंगु
सत्य मेव जयतेया प्ले कार्डत
अनं कँ थें जाःगु अल्याख मिखात नापं
जि पाखे धस्वाकाच्वंगु च्वला पतिंत ।

तर, ए जिगु विश्वासया ज्यानमारा !
छं स्यात जिगु विश्वास जक
तर स्यायेफइमखु छं जिगु गर्भयातः
फुसा स्या छं जिगु हिम्मतयातः
छायेकि, छं स्यायेमफुत जिगु आत्मायातः ।

More Stories Like this