'डुंगा डुबे जूसा सकलें डुबे जुइ'

येँ (सन्ध्या टाइम्स)/एकीकृत माओवादी अध्यक्ष प्रचण्डं आःया अवस्था धइगु राजनीतिक दलतय्गु अग्नि परिक्षा खः धासें शान्ति व संविधानया छगः हे डुंगाय् च्वनाः फुक्क दलत वनाच्वंगु दु छुं जुयाः डुंगा डुबे जुल धाःसा फुक्कं हे डुबे जुइ धयादीगु दु ।

वय्कलं धयादिल, 'फुक्क दल छगः हे डुंगाय् सवार जुयाच्वंगु दु, डुंगा डुबे जुल धाःसा माओवादी जक मखु फुक्क हे डुबे जुइ। तःधंगु दलया ल्याखं माओवादी अप्वः डुबे जुइगु स्वाभाविक खः ।'

शान्ति व संविधानयात सकारात्मक निष्कर्षय् थ्यंकेगु नितिं प्रतिपक्ष मजुसे रचनात्मक भूमिका म्हितेत प्रचण्डं नेपाली कांग्रेस व एमालेयात इनाप यानादिल। आः न्ह्यानाच्वंगु शान्ति प्रक्रिया गम्भीर मोडय् थ्यंगु दु धासें वय्कलं उकियात ताःलाकेगु नितिं फुक्कं जिम्मेवार जुयाः न्ह्याः वनेमाःगु खँ नं बः बियादिल। आः स्वलाया निंतिं छम्हेस्यां मेम्हेसित न्ह्यःनेलाःथे मधायेगु व तुति सालेगु प्रबित्ति त्वःतेत नं वय्कलं इनाप यानादिल ।

एबीसी टेलिभिजन प्यदँय् थ्यंगु लसताय् थौं येँय् याःगु समारोहय् न्ववासें अध्यक्ष प्रचण्डं शान्ति व संविधान निष्कर्षय् थ्यंकेगु नितिं आरोप-प्रत्यारोपया शैली व सोचयात त्वःताः रचनात्मक कथं न्ह्याः वनेत नं इनाप यानादिल ।

थःगु पार्टीया उपाध्यक्ष डा. बाबुराम भट्टराईया नेतृत्वय् सरकार दयेके धुंकाः शान्ति प्रक्रियापाखें गति काःगु दावी यासें प्रचण्डं शान्ति सम्झौता कथं शान्ति प्रक्रिया व संविधान निर्माणया ज्या पूवंकी धकाः प्रतिबद्धता नं प्वंकादिल ।

अध्यक्ष प्रचण्डं जनतां राजनीतिक दल व नेतातय्त ब्वः बीगु ग्यानापुगु संस्कृति विकास जुयावःगु खँय् चिन्ता प्वंकुसें जनता कथं हे नेता जुइगुलिं छखेरं जक नेतातय्त आलोचना मयासे रचनात्मक जुयाः सोचे यायेगु बानी यायेत नं इनाप यानादिल ।

उगु ज्याझ्वलय् नेपाली कांग्रेसया महामन्त्री प्रकाशमान सिंहं शान्ति प्रक्रियायात न्ह्यब्वाकेत सेना समायोजन सम्बन्धी विशेष समितियात प्रभावकारी यायेमाः धयादिल ।

वय्कलं समायोजनया प्रक्रिया न्ह्याके न्ह्यः लडाकु वर्गीकरण, ढाँचा नापं मेमेगु विषयय् राजनीतिक सहमति ब्वलंकेमाःगु खँ नं कनादिल। शान्ति प्रक्रिया पूरा मजुइकं संविधान जारी याये मजिउ धइगु खँय् थःपिनि पार्टी दृढ दु धासें वय्कलं शिविर पूर्णरुपं खाली मजूतले व माओवादी सेनापाखें ब्यागलं मजूतले माओवादीया नेतृत्वयात स्वीकार मयायेगु कांग्रेसया अडान यथावत दु धकाः नं धयादिल ।

एमाले उपाध्यक्ष वामदेव गौतमं थःपिनि पार्टीं सरकारया बांलाःगु ज्यायात समर्थन यायेगु अले बांमलाःगु ज्यायात विरोध यायेगु जुइ धयादिल ।

उकथं हे राष्ट्रिय जनमोर्चाया अध्यक्ष चित्रबहादुर केसीं राजनीतिक दलत सत्तामुखी मजुसे मुलुक व जनतामुखी जुइगु ज्याझ्वः हयेमाः धयादिल। वय्कलं नेतात सत्तामुखी जुइत न्ह्याथेज्याःगु नं सम्झौता यायेगु परिपाटीं मुलुकय् विकृति व दण्डहीनता अप्वया वःगु खः धयादिल ।