देय् दबूया १७ दँ

नेवाःतय् राष्ट्रिय संगठन नेवाः देय् दबूया झिंन्हय्दँ बुदिंया छगू ज्याझ्वःया दथुइ झःझः धायेक हन। संस्कृतिविद् सत्यमोहन जोशी मू पाहां कथं झाःगु उगु ज्याझ्वलय् काठमाडौं विश्वविद्यालयपाखें महा विद्यावारिधी उपाधिं विभूषित जुयादीगुलिं भाजु जोशी लसताय् लुम्बिनी विश्वविद्यालयया उपकुलपति पदय् नियुक्त जुयादीम्ह त्रिरत्न मानन्धर, त्रिभुवन विश्वविद्यालयया उपकुलपति प्रा.डा. हिराबहादुर महर्जन नापं ज्वः मदुगु ज्या यानादीपिं नेवाः पर्वतारोहीपिं ज्ञानेन्द्र श्रेष्ठ, सुविर श्रेष्ठ व सन्त कुमार महर्जनपिंत नं देय् दबूपाखें हनेज्या जूगु खः। वय्कःपिंत देय् दबूया न्वकु धर्मशोभा तुलाधरं नेवाः परम्पराकथं ख्येंसगं बियादीगु खः। ज्याझ्वलय् नेवाः देय् दबूया लुमन्ति-पौ नं विमोचन जूगु खः ।

सम्मानित जुयादीम्ह जोशीं स्वनिगलं पिने व स्वनिगः धकाः नेवाःतय् दथुइ संकुचित भाव तये मजिउ धयादिल।
ज्याझ्वलय् नेवाः देय् दबूया संरक्षक मल्ल के. सन्दरं नेवाःतय्के नेवाः भावना दःसां नं थःगु म्हसीका बीगु इलय् धाःसा स्वाभिमान तसकं म्हो जक खने दु धयादिल। शिक्षाविद् लक्ष्मण राजवंशीं त्रिभुवन विश्वविद्यालय नेवाःतय्गु सम्पत्ति व हिचःति निर्माण जूगु खँ ल्वःमंके मजिउ धासें जग स्वंगु इलय् त्रिपुरेश्वरंनिसें किपू तक मनूत छस्वाः जूगु खँ लुमंकादिल ।

डा. त्रिरत्न मानन्धरं त्रिभुवन विश्वविद्यालय लांलां बन्द जुयाच्वंगु खँय् नेवाः देय् दबुलिं नं चिउताः प्वंकेमाःगु खँ कनादिल। वय्कलं थौंकन्हय् नेवाः बौद्ध साहित्यय् विद्यावारिधि याइपिनिगु ल्याः अप्वयाच्वंगु लसताया खँ खः धयादिल । अथे हे त्रिभुवन विश्वविद्यालयया उपकुलपति डा. हिराबहादुर महर्जनं नेवाःतय्सं प्रशासनिक ज्या याये फइ मखु धयागु धारणा गलत खः धासें थःगु कार्यकालय् सकसिनं ग्वाहालि यात धाःसा अवश्य नं सफल जुइगु विश्वास प्वंकादिल ।

ज्याझ्वलय् सगरमाथा आरोही ज्ञानेन्द्र श्रेष्ठं सगरमाथा आरोहणया अनुभव कनादिल। ज्याझ्वःया पाहां डा. सुमित्रा मानन्धरं थम्हं अबुया नामं छगू लख दांया अक्षयकोष परम्परागत व्यवसाय संचालन याना वयाच्वंम्ह मिसापिंमध्ये छम्हेसित व मांया नामं नं अथे हे मेगु छगू सिरपाः नीस्वनागु घोषणा यानादिल ।

ज्याझ्वलय् नेपालभाषा मंकाः खलःया नायः पद्मरत्न तुलाधर, सभासद् डा. मंगलसिद्धि मानन्धर, पुलांम्ह मन्त्री राजेन्द्र श्रेष्ठ, ज्यापु महागुथि येँ नगरया नायः ई. मोहन कृष्ण डंगोल, पर्र्वतारोही सुविर श्रेष्ठ, सन्तकुमार महर्जन आदिपिं नं उपस्थित जुयादीगु खः। ज्याझ्वः नेवाः देय् दबूया नायः नरेश ताम्रकारया सभापतित्वय् जूगु खः ।