छम्ह छुँया कारणं नेवानिया उडान रद्द

येँ (सन्ध्या टाइम्स)/येँनं बैंकक ब्वयेमाःगु नेपाल वायुसेवा निगमया छगः विमानय् थौं सुथय् छम्ह छुँ दुहां वनाः अन्ततः उडान हे रद्द याये माल। बोइङ्ग�७५७ विमानय् सुथय् ब्वये त्ययेकाः अन दुने छुँ छम्ह ब्वाँय् वंगु खने दयेवं उडान दिके माःगु खः। लिपा छुँ मालेगु लागिं डेढ घण्टा तक कुतः यातं नं लुइके मफुसेंलि अन्ततः उडान हे रद्द यायेमाल ।

उगु विमान क्याप्टेनद्वय रविन्द्रकुमार शेरचन व वाईके भट्टराईपिंसं ब्वयेकेत्यंगु खः। तर विमानय् छुँ खने दयेवं उडान रद्द याये माल। विमानय् दुहां वंम्ह छुं विमान ब्वया च्वँच्वं हे छुं कथंया तार चाना बिल धाःसा विमान दुर्घटना समेत जुइफुगु खतरा दुगुलिं दुने छुँ च्वनाच्वंगु दयेक दयेकं उडान याइ मखु। तर छुँ स्यायेत विष नं छ्यले मजिउगु कारणं विमान दुने च्वंम्ह छुँयात छुँगः तयाः हे ज्वनेमाः। उकिं आः विमानया कर्मचारीत छुँगः ज्वनाः अन पियाच्वंगु दु ।

निगमयाके दुगु निगः विमान मध्ये थौंकन्हय् चले जुयाच्वंगु थ्वहे छगः जक खः। मेगु छगः दयेकेगु लागिं इजरायल यंकातःगु दु। आः बैंकक ब्वयेत्यंगु विमानय् १३० म्ह यात्रु दुगु खः। थ्व विमान येँनं बैंकक वनाः अनं हानं मेपिं यात्रु हयाः थनं बहनी मलेशिया ब्वये माःगु खः। तर छुँ मलूगु कारणं थौं बहनीया उडान नं रद्द जुइधुंकूगु दु। गाडीं खाना तये यंकूबलय् बाकसया छुँ विमानय् वंगु अनुमान याःगु दु ।

निगम सूत्रं धाः कथं छुँ छम्हेसिया कारणं उडान रद्द जुयाः निगमयात थौं छन्हुं हे करिब ६० लाख तका नोक्सान जूगु दु। छुँ ज्वने मफुतले उडान याये मजिउगु खँ धाःगु दु।
वंगु साउन ३१ गते स्वीडेनया स्टकहोमं अमेरिकाया शिकागो ब्वयेत्यंगु एसएसएस एअर लायन्सया छगः विमानय् नं छुँ छम्ह लुया वयेवं उडान रद्द यायेमाःगु खः। उगु विमानय् ३६ घौ लिपा तिनि विमानय् दुहां वंम्ह छुँ लूगु खः ।