पासवानयात थःगु हे पार्टीपाखें कारवाही
येँ (सन्ध्या टाइम्स)/छम्ह जक सभासद् दुगु दलित जनजाति पार्टीया केन्द्रीय दुजःतय्सं प्रधानमन्त्री डा. बाबुराम भट्टराईयात थःपिनि पार्टीया समर्थन मदु धकाः स्पष्ट याःगु दु। पार्टी अध्यक्ष एवं सभासद् विश्वेन्द्र पासवानं सरकारयात समर्थन याःसां व वय्कःया यकःति निर्णय खः, पार्टीया निर्णय मखु धकाः नं दावी याःगु दु ।
कृष्णकुमारी तामाङ, सीताराम हरिजन, डिल्ले मिझार, जगजीवन राम, रुन्दी राम, झबर राम, जगतवीर दर्नाल, राजकुमार मण्डल, भोला खत्वे, मुन्नी दास, लक्ष्मीदेवी गहतराज, बिष्णुबहादुर विश्वकर्मा, रहिस अहमद सिद्धिकी, वीरेन्द्र सदाल लगायतया केन्द्रीय दुजःतय्सं मंकाः कथं थौं सुथय् जारी याःगु प्रेस विज्ञप्तिइ उगु खँ न्ह्यथनातःगु दु ।
वंगु साउन ३१ गते लहानय् च्वंगु केन्द्रीय समितिया बैठकय् पार्टी अध्यक्षयात कारवाही यायेगु निर्णय जूगु खँ नं विज्ञप्तिइ न्ह्यथनातःगु दु। केन्द्रीय दुजःतय्सं सरकार दयेकेत भारतं २०० करोड तका ध्यबा वःगु कारणं यदि मन्त्री जुइ मजुल धाःसा पार्टीं छगू करोड तका काये खनी मखु धकाः अध्यक्षं हल्ला याना जूगु द्वपं नं बिउगु दु। उगु पार्टीपाखें पासवान छम्ह हे जक समानुपातिपाखें सभासद् जुयाच्वंगु दु ।
