ताःचा लःल्हायेगु ज्यायात कांग्रेसया लसकुस
येँ (सन्ध्या टाइम्स)/शिविरय् च्वंपिं लडाकुया ल्वाभः तयातःगु कन्टेनरया ताःचा लःल्हायेगु माओवादीया ज्यायात नेपाली कांग्रेसं सकारात्मक धासें लसकुस याःगु दु। शेरबहादुर देउवाया संयोजकत्वय् दयेका तःगु कांग्रेस शान्ति समितिया थौं च्वंगु बैठकं माओवादीया पलाःयात लसकुस याःगु खः। बैठकं शान्ति प्रक्रिया पूवंकेगु नितिं ल्यं दनिगु ज्या याकनं न्ह्यब्वाकेत माओवादीयात इनाप नं याःगु दु। लडाकु समायोजन व पुनस्थापन न्ह्यः हे क्वचायेके माःगु मापदण्ड, दर्जा निर्धारण, संख्या लगायतया मुद्दाय् सहमति ब्वलंकेत बः बिउगु खँ समितिया दुजः नापं नेता रामशरण महतं धयादीगु दु। देउवाया छेँय् जूगु उगु बैठकं लडाकुयात ल्वाभःपाखें ब्यागलं तयेमाःगु शान्ति सम्झौताय् दुगु बुँदायात पालना यायेत नं बः बिउगु दु ।
