थीथी संस्थायात ग्वाहालि

येँ (सन्ध्या टाइम्स)/कृष्णबहादुर स्मृति कोष स्थापना जूगु लसताय् थन जूगु छगू ज्याझ्वलय् संस्कृतिविद् सत्यमोहन जोशीं थीथी संस्थायात कोषया रकम लःल्हानादिल। नेवाः संस्कृति संरक्षणया निंतिं याना वयाच्वंगु योगदानयात कदर यासें नेवाः एफएम १०६.६ मेगाहर्जयात न्यय्द्वः तका लःल्हानादिल। शैक्षिक क्षेत्रय् नं विपन्न वर्गया निंतिं विशेष योगदान याना वयाच्वंगु संस्थायात छात्रवृत्ति कथं ७५,००० तका दां नापं संस्थाया नायः उत्तम सञ्जेलयात नं सम्मान यानादीगु खः। अथे हे ताः ई न्ह्यवंनिसें शैक्षिक लागाय् योगदान याना वयाच्वंगु पद्मोदय हाइ स्कूलयात छात्रवृत्तिया निंतिं छगू लख तका दां लःल्हानादिल ।

ज्याझ्वलय् न्ववासें भाजु जोशीं मांबौया लुमन्तिइ नीस्वंगु थुगु कोष राष्ट्रया निंतिं छगू नमूना जूगु दुसा मेमेपिनि निंतिं हःपाःया श्रोत जूगु दु धासें मदुम्ह मानन्धरया योगदानयात लुमंकादिल। उगु कोष मदुम्ह मास्टर कृष्णबहादुर मानन्धरया लुमन्तिइ वय्कःया छेँजःपिंसं न्यागू लख दांया अक्षयकोष तयाः नीस्वंगु खः। ज्याझ्वः कोषया नायः नापं मदुम्ह मानन्धरया तःधिकःम्ह काय राजबहादुर मानन्धरया सभापतित्वय् जूगु खः ।