आः पत्रकार सिधयेकेगु डनतय् ग्वसाः

पत्रिकाय् समाचार च्वःगु हे कारणं पत्रकारतय्त आक्रमण याइगु घटना आः तःधं जुजुं वयाः पत्रिकाया ज्याकुथी हे तोडफोड यायेगु तकया अवस्थाय् थ्यंकः वःगु दु। म्हिगः तिनि राजधानीं पिहां वइगु 'नयाँ पत्रिका' न्हिपौया ज्याकुथी छपुचः गुण्डातय्सं आक्रमण यानाः आपालं क्षति याना थकूगु दु। धायेत उगु पत्रिकाय् पिहां वःगु छगू चीधंगु समाचारं यानाः अन आक्रमण याःगु खः धाःसां वास्तवय् आक्रमणकारीतय् उद्देश्य उगु पत्रिकां निरन्तर रुपं च्वया वयाच्वंगु राजधानीया डनतय् समाचारयात पनेगु हे जुइमाः धकाः अनुमान यायेछिं। येँय् तसकं अप्वया वयाच्वंगु गुण्डागर्दी व उमित राजनीतिक दलतय्सं बीगु याना वयाच्वंगु संरक्षणया अन्त्य जुइमाः धकाः प्यखेरं सः थ्वयाच्वंगु हे इलय् डनतय् पुचलं पत्रिकाया ज्याकू व पत्रकारतय्त हे यानाच्वंगु थ्व आक्रमणपाखें वास्तवय् उमिगु शक्ति गुलि अप्वयेधुंकल धइगु खँ छर्लंग क्यना बिउगु दु ।

डनतय् गतिविधि आः सामान्य अपराधं नं थहां वनाः ततःधंगु ठेक्का ल्हातय् लाकेगु, ततःधंगु लगानीया अवैध व्यवसाय यायेगु आदिपाखे नं केन्द्रित जूवंगु दु। थुकिं डनतय्त आर्थिक रुपं नं सम्पन्न याना बिउगु दुसा उकिया बलं उमिगु संगठन थःहे मजबूत जुइगुया नापनापं थःत दइगु संरक्षण नं अझ क्वातुया वइगु सम्भावना अप्वयेका बिउगु दु। थज्याःगु अवस्थाय् डनतय् कुकृत्ययात उलाः समाजयात सचेत यायेगु ज्या याइगु निकाय धइगु सञ्चार माध्यम छगू हे जक खः। आः थ्व सञ्चार माध्यमया नं म्हुतुप्वाः तिकेगु लागिं डनतय्सं साम दान दण्ड भेदया नीति ज्वना हःगु खनेदु। पत्रकारतय्त जुयाच्वंगु आक्रमण उकिया हे दसु खः ।

More Stories Like this